Ni ma jak u starzikōw!

Jo tyż mojim starkōm przoła, chocioż jedna bōła baba ze wsi, a drugo paniczka ze bogatyj familije. Jeji starzik mioł jakiś fest dobry werk, bezto piniōndze mioł a wszyjski wnuki rozpuszczoł! S tōm starkōm, co bōła ze wsi, to jo miyszkała bez siedym piyrszych lot swojigo życio i to skuli ni przaja tym wszyjskim ôpowieściōm ludowym. Ôna mi pokozała, że za miastym je tyż piykny świat, kaj rośnie ôbiyli, kaj sadzi sie nasze roztōmiłe zimioczki, kaj pasōm sie krowiczki, a we chlywiku rechtajōm prosiynta! I za to jo ji dzisio dziynkuja.
Z mojōm drugōm starkōm toch sie skamraciła, jak ni było już bez 10 lot. Z niōm szło pogodać ô modzie, ô babskich rzeczach i ō synkach, co mi sie widziały. Ô tym, że bōła dobro do inkszych ludzi, toch sie niy dowiydziała we swoji chałupie, yno ôd cudzych ludzi, co im wiela bez II wojna pōmōgła. Wszyjscy sie dziwowali, że jednako biydnych ludzi rozumiała, a to sie mało zdorzało! Roz żech sie jōm ô to spytała, a ôna mi ôdpedziała: Cōż tyż to te ludziska godajōm, jo im dała yno to, co żech miała zatela, bo w dōma mie dycki uczyli, coby Bożygo daru niy marnować!
Starzika miałach yno jednego, bo tyn drugi umrził 10 lot przed moji narodzynim. Tyn mōj starzik bōł fesztrym i caluśki czos chodziył po lesie, a do swoich dziecek ani do wnukōw czasu niy mioł. Starka sie nikedy na niygo gorszyła, bo godała, że ôn sie ze lasym, a tōm dziwokōm zwierzinōm ôżyniył! A jo teroz wiym, że ôn niczego niy robiył ōd połōwki, yno wszyjstek do porzōndku, bezto do familije mu czasu dycki brakowało. Jednako powiōdło mi sie ś nim skamracić jak żech już bōła troszka starszo. Roz za czos wziōn mie do lasa, a nawet pokozoł mi „utopki”! To były wydry, co pływały we leśnym stawie. Ze daleka richtik wyglōndały jak te stwory, co ô nich przi szkubaniu piyrzo bojali. Wiela mi tyż porozprowioł ô dziwokich zwiyrzach. Bezto jo teroz umia ô tym pogodać mojim wnukom a inkszym dzieckōm, jak mie tam kaj do szkoły zaproszōm.
To je szczyro prowda: Ni ma jak u starzikōw! Dobrze, że mi Pōnbōczek takich ludzi doł!

Baner reklamowy

Komentarze

Dodaj komentarz