Nojwyższy czos podziwać sie na zegrōdka


Niby mrozu wiela niy bōło, ale modym strōmikōm a krzokōm zaszkodziył, bo jak były mokre ôd dyszcza, a mrōz praje w nocy chyciōł, to ta modo kora na nich miejscami popynkała. Taki prōntki trza bydzie powycinać! Hortynsyje tyż troszka przemarzły, ale sie niy starōm, bo ône sie dycko gibko spamiyntajōm, a dali bydōm te nojpiykniyjsze we ôkolicy!
Wczora byłach sie podziwać na kwiotki, ale tam się dziepiyro zaczyno ruszać, bo bez cołko zima śniega a dyszcza mieli my jak na lykarstwo. We inksze zimy to we cieplyjszych miyjscach po świyntej Agneszce, sie tulpy spod śniega przebijały ku słōnku, aż jo musiała ich przikrywać resztōwkami świōntycznego krisbaumu! Tyn rok planuja se na wiosna nasadzić jeszcze inksze piykne kwiotki. Jużech se wybrała miejsce na fojerleluje a na rōzy, co im fest przaja, ale wiela tego sadzynio niy bydzie, bo działka mōmy maluśko.
Kożdy rok se godōm, że posadza se tyż taki kwiotki, co kwitnōm bez zima abo ku wiośnie, ale jak sie rozciepli mōm tela roboty, że dycki ô tym przepōmna! Moja kamratka mo piykny ciymiernik pod chałpōm, a szumne wrzośce pod choinkami na placu. Możnej kery wiy jak sie te flance po naszymu mianujōm? Kejś na tyn piykny zimowy, bioluśki ciymiernik godali ze to je czarodziejski zieli, bo kwitnie bez zima, jak je mrōz na dworze, a to je przeca prociw naturze, niy? Bezto żodno porzōndno gospodyni by go na zegrōdce abo wele chałpy niy posadziyła, coby na nia „marcha” niy godali! A teroz baby sie niy bojōm, bo zmōndrzały i wiedzōm, że czarōw ni ma, ale eli to je prowda, co myślicie?

Dziynkuja panoczkowi Alojzowi Zimōńczykowi za pōmōc we ślōnski korekcie.

Baner reklamowy

Komentarze

Dodaj komentarz