Jednako kole trzeci godziny po połedniu wszyjscy już mieli fest głōd, a trza bōło tymu zocnymu byzuchowi zafōndować jakisik ôbiod. Szef kozoł Pietrowi zakludzić ich do jakij niyzadrogi resztauracyje. I tu sie zaczły starości, bo jedna, kaj dobry ôbiod dowali, bōła we tyn dziyń zawrzito, a we drugi już ôbiadōw niy mieli. Bezto nic niy ôstało, yno iś do tyj nojdrogszyj na rynek. Tam zbōnek wody ze citrōnym kosztowoł tela, co dobry ôbiod! Znajōmek, co dobrze szprechoł, spytoł sie tych Niymcōw, coby chcieli do jodła, ale ôni padali, że weznōm se to samo, co drudzy.
Pomiyndzy tymi Czechami bōł jedyn chop, co sie kejś polskigo bezmała uczył i ôn se zażyczōł „menu” a padoł, że se sōm wybiere! Na głos czytoł kożde jodło, a padoł, że we Czechach majōm taki same! W kōńcu trefiył na miynso, a tam we trzeci linijce pisało: „wołowina w sosie własnym”. Tyn chop zblod, a głos sie mu zatrzōns, bo ledwie wyszeptoł: Co to je wołowina?
Teroz Pieter bōł we saku: Jak mōm mu to pedzieć? Przeca wołowina, to je wołowina i tela! Ale spōmniało mu sie, że my, Ślōnzoki inakszy na te miynso godōmy, możnej to tyn Czech spokopi: Wiysz, to je ôwiynzi miynso… miynso ze krowy, rozumisz?
– Howiezi maso? S krawy niy
s wola? – Tyn Czech dalij troszka Pietrowi niy dowierzowoł. – Odpuść, ale zni to jako lidske maso, u nas „volovina” to je moc wielka gupota, bo wy mluwite „ty gupku”, a u nas se rzika „ty wole”, rozumisz tymu Petrze?
Noreście wszyjstek se wyjaśniyło, a chopy sie w kōńcu dogodali! Ale jako sam teroz ôbjaśnić tych Niymcōw, co kōniecznie chcieli wiedzieć, ô co poszło? Pieter cosik tam wystynkoł, ale ôni i tak niy poradzili tego spokopić! Bezto potym mōj znajōmek ôbsztelowoł jodło na swoja gowa: zupa ze nudlami, frytki a kotlet a ku tymu jeszcze dwa zbōnki tyj drogi wody, a padoł se tak: Teroz to mi już żodyn godoł niy bydzie, że jo mu miynso ze gupieloka ôferowoł!
Jako widzicie roztomili, czeski a polski jynzyk niby sōm taki do sia podane, ale sie tyż ôszydzić idzie. Ze Czechami lepszy sie po naszymu dogodocie, ale pozōr se trza dycki dać!
Komentarze