20051611
20051611


Dycko za bajtli jak my usłyszeli kukołka kukać, to my wołali: kukołeczko, piykny ptoszku, słysza twoji kukanie, powiydz ty mi bez cygaństwa, wiela lot mi jeszcze zostanie. I kukołka kukała, a my głośno liczyli, a jak za wczas przestała kukać, to my jom zaś przezywali: kukołeczko ty cygonko, źle żeś wywrożyła, bo tak krotko jak ty kukosz, bydzie starka żyła.Jak zaś jako starka czy starzik był ciynżko chory – to yno z utynskniyniym czekali na piyrsze wiosynne kukanie, bo jak usłyszeli, to znaczyło, że zaś cołki rok do nastympnyj wiosny przeżyjom w zdrowiu, przeca kukawka ich okukała.Starsze frele na wsiach, kere ni miały wziyncio u karlusow, po kryjomu szły na kroj lasa i wołały na kukołka, żeby zakukała, w kero niedzieliczka przidzie ku nij jaki karlus na zolyty. Liczyły te kukanie na palcach i czekały, żeby jak nojpryndzyj kukawka przestała liczyć te tydnie. Niy dej jednak Boże, kiedy w połowie kukanio odezwała sie inkszo kukawka, bo znaczyło to, że frela ni mo co latoś liczyć na galana. Zaś frele, kere miały już swojigo karlusa, pytały sie kukołki, na kero niedziela tyn istny bydzie prosiył łojcow o jeji rynka. Kukołka kukała abo niy kukała, taki to było wrożyni. Nikedy sie to kukołce udało i potym sie mamuliczki chwoliły miyndzy sobom, że Ance czy Maryjce bydom latoś weseli robić, bo kukowka im wywrożyła.Jednak jedna kukułczano wrożba to i jo wierza. Godali zawsze, że jak usłyszysz piyrszo kukołka kukać, a ni mosz w kapsie ani grosza, to ni mosz co liczyć bez cołki rok. Totyż kery był przezorniejszy, już na poczontku marca do kapsy kożdych galot, kabota czy kecki wstyrkoł choby yno jedyn grosik, coby go kukawka niy zaskoczyła. Nikere baby to se pozaszywały grosiki w rombkach swojich kecur czy jakli, żeby ich razinku niy okukała, totyż dycko byli przi piniondzach. Jo se tyż dycko obiecuja, że choćby grosik w kożdyj kapsie musza mieć i dycko mi sie o tym wspomni, jak usłysza kukołka kukać, i już jest po fertiku.

Komentarze

Dodaj komentarz