Niy dziwota, że maj nazywajom miesioncym zakochanych. Szkoda yno, że tak gibko dycko przeleci. No ale godajom starsi ludzie, że majowo miłość jest tako jak majowy dyszcz – gichnie z cołkij siły, blyskawicom niebo podziurawi i za chwilka jest po nim. No ja, człowiek już tyż stary, to zapomnioł, jak to tam rychtyk było. A jak słoneczko takimu starzikowi krew w żyłach przigrzeje, to mu sie zdo, że zaś jest młody i tyż tak poradzi jak downij. Gibko sie jednak przekonuje, że tak jak downij to yno poradzi kwiotki woniać w zegrodzie.W tym flidrowym miesioncu majom tyż miejsce inksze ważne momynty ludzkigo życio, jak egzaminy maturalne. Zaś dużo młodsi od maturzystow tyż w maju przeżywajom swoj ważny etap życiowy, Piyrszo Komunio Świynto. Prowda, że najbardzij sie pamiynto z tyj uroczystości te wszystki geszynki od potkow, starek i ciotkow. Tela że teraz te geszynki tyż inaczyj wyglondajom. Kaj by tam kiedyś na komunijny geszynk koło dowali i to taki, że jest drogsze od starszego auta. Abo komputer i inksze wyszukane klamory elektroniczne jak wieże hi-fi czy kino domowe.Tyż żech był latoś na gościnie komunijnyj mojigo nojmłodszego wnuka. Prawie to trefiyło 1 maja i przipomniały mi sie młode lata, ni mom tu na myśli tych pochodow z czerwonymi fankami, chocioż to zawsze wraco w tyn dziyń, ale moja Piyrszo Komunijo Świynto.Było to krotko po wojnie w 1948 roku. Do bazyliki św. Antoniczka my noleżeli wtedy, bo w Wielopolu kościoła niy było i dziecka piechty szli taki kawał drogi. Mało kery jechoł autym, bo chyba yno jedno na wsi było. W ta niydziela rano to mi jeszcze krawiec ancug kończył i trzeciom turom landauerym na ostatni driker mie zawiyźli do kościoła.Geszynk tyż najwiynkszy pamiyntom dobrze, była to przigodowo ksionżka pt. „Dolina bez wyjścia”, keryj autora niy pamiyntom, bo pożyczoł żech jom jakimuś kamratowi i wiyncyj jom niy oglondoł.
Komentarze