Za młodu, jak sie miało 7-10 lot, to sie doczkać niy szło, żeby już mieć te 18 lot, kedy przed człowiekiym otwiyrajom sie dźwiyrze na świat. Już idzie do kina wlyźć na film, kery yno jest dlo dorosłych, idzie w sklepie piwo dostać i cygarety, kere dlo dziecek som zakozane. Kożdy nastympny gyburstag mo jednak wielki feler, bo sie człowiek przekonuje, że gibko przibywo mu lot. Dziwni som ludzie, nojprzod se lot przipisujom, żeby mogli iść do kina abo posłuchać wicow, kere starsi se łosprowiajom, a po jakimś czasie se lot odpisujom, żeby sie odmłodzić. Nojbardzij to praktykujom kobiytki i łone w pewnym wieku już niy bardzo chcom fajrować swoje kolejne urodziny i chyntnie by obchodziły imiyniny, keby niy nasza tradycjo.Był żech jednak 17 maja na 80. urodzinach jednyj starki, po keryj niy idzie poznać tego, że już osmy krziżyk dźwigo. Niyjednymu, kery połowica tych lot mo zaledwie, przidołby sie od nij humor i chyńć do życio.W radlińskij rymizie strażackij fajrowała swoji 80 lot, Ślonzoczka nad Ślonzokami Aniela Langer. W 1996 roku w IV konkursie „Po naszymu, czyli po ślonsku”, kery to wymyśliła Maria Pańczyk, redaktorka Radia Katowice, radlinioczka Aniela Langer została Ślonzoczkom Roku. Startowała do tego konkursu trzi razy i jak sama godała, „yno moj upor mi pomog, żech jednak tyn tytuł zdobyła...”. To ona wtedy pedziała zdanie, kere do dzisioj pamiyntom i jest mi fest zocne: „Zanim przestompisz domu tego progi, wytrzij se nojprzod jynzyk, a dziepiyro nogi...”.Na urodzinach spotkała sie wiykszość byłych laureatow tego wspomnianego konkursu, bo som my członkami klubu „Czelodka po naszymu” i bez to nos wszystkich zaprosiyła. Była tyż Maria Pańczyk, keryj godomy „nasza mamulka”, a z Rybnika, krom mie, była tyż Betina Zimończyk i Zygmunt Bednarek.Laureatka nos tak piyknie przijyna i ugościyła co nimożno, a tak nas wszystkich bawiyła, że kulali my sie ze śmiychu. Nojlepij jak wspominała swoji młode lata, kiedy to piyrszy roz synkowi kusku dała, a miała już 20 lot. Jo sie jom pytoł, czy aby niy boła sie, że bydzie miała z tego dziecko, to odpedziała: „Tako zaś gupio żech niy była...”. Cudowno starka z tyj Langerki. Gości była chyba ponad setka, był tyż zespoł Familijo ze Skrzyszowa, z kerym my z poczontku śpiywali okolicznościowo śpiywka przez nich prziszykowano. Przijechała tyż z Knurowa było laureatka Sztefka Grzegorzyca ze swojim zespołym Wrazidloki, kery tak piykny wystymp doł, że naszyj laureatce płaczki w oczach stanyły. Dlo takich jednak chwil wert jest żyć, pedziała Langerka, za chwila zaś uśmiychnyto jak na tyj fotce.
Komentarze