Miyszko na tyj wyspie – na keryj ludzie do gory nogami chodzom – moj znajomy Ślonzok rybniczan Wiktor Watoła. Jest to już człowiek w podeszłym wieku i czyto nasze „Nowiny”, kere przichodzom do niego z opoźniyniym od bardzo downa, a już najbardzij sie raduje, jak może coś poczytać napisane po naszymu, bo mu to młode lata przipomino, kiedy sie yno tak przeważnie godało. Łoński rok był w Rybniku i odwiedziył mie tyż w mojij chałupie. Przi tym spotkaniu powiedzioł mi, że w Nowyj Zelandii tyż majom utopka, kery sie nazywo Taniwha. Mo jednak tyn ich utopek inkszy wyglond i fest wielki posłuch u tamtejszych tubylcow Maorysow.Maorysi przibyli na Nowo Zelandia przed ponad tysioncym lot bez mała z Hawajow. Byli to ludzie fest ajnfachowi, ni mieli swojigo pisma, niy znali kołka, ni mieli tyż żodnyj religie, bez to tyn utopek Taniwha stoł sie dlo nich bostwym. Miyszkoł łon wtedy i dalij urzynduje w nojwiynkszyj rzyce Waikato i Maorysi yno w niego wierzom. Taniwha tak jak nasz ślonski utopek umi przibrać rostomajnty wyglond. Roz podobny jest do łogromnistego wynża, zaś inkszy roz zamiynio sie w krokodyla z wielkimi zymbiskami i jak sie znerwuje, to biyda go majom ucholkać, muszom mu wtedy jaki okup dać, bo ni ma mu wtedy rady. Liczom sie śnim tyż bioli, bo łoni tam rzondzom, mom na myśli Anglikow. Pora lot tymu chcieli wybudować autostrada, kero kole samyj rzyki Waikato miała lecieć z połnocy na połednie tyj zielonyj wyspy. Pościongali ludzi, wielki maszyny i łogromniste auciska do wywożynio ziymie i cołkij materyje. Ujechali już doś dobry konsek tyj autostrady, wyrombali kyns dżungle, ale jak sie znojdli blisko rzyki Waikato, kaj jest krolestwo tego jejich utopka, tyn sie znerwowoł i padoł: „Sztop! Dalij ani kroku!”. Taniwha ściongnył tako wielko burza z blyskawicami, a dyszcz loł choby z giskany bez pora dni bez przerwy. Rzyka tak sie dźwigła i wyloła, że cołki tyn drogi sprzynt Anglikom porwała i kyns gotowyj już autostrady przepadło bez widu. Zaroz tyż ci tubylce zaczli protestować, że niy dajom dalij tyj autobany ciongnyć, bo jak sie Taniwha bardzij znerwuje, to może im jejich chałupy tyż zniszczyć. Budowa stanyła w martwym punkcie i Angole niy poradzili nic dalij zrobić, a straty coroz wiynksze. Zebrała sie cołko starszyzna od tych Maorysow i tyn jejich wodz na naradzie uznoł, że trza Taniwhy jakoś przekupić. Musieli Angliki zapłacić pieronowe piniondze tym Maorysom, żeby przebłagali u tego Taniwhy zgoda na dalszo budowa autobany. Pora miesiyncy to trwało, a koszty coroz wiynksze, ale w końcu sie udało i tyn jejich utopek wiyncyj im szkody niy robiył.Niydowno zaś niydaleko wielkigo miasta Kerikeri zacznył rzond budować wielki hareszt, zaś sie zaczły wielki protesty tubylcow, bo tam miyszko ich bożek Taniwha i może sie znerwować. Zaś ta sama lajera – muszom dostać tela a tela, żeby go przekupić.Szkoda, że tu u nas sie żodyn z Utopkiym niy liczy, a czasym by sie przidało.
Komentarze