Som Andersen już jako znany pisarz dycko wspominoł, że jak chcioł sie przeniyść do krajiny bojek, to mu jego starka zakłodała jeji brele, a o sobie godoł, że wychowoł sie na kaczym placu, ale wykluł sie z łabyńdzigo jajca.Skuli tego, że latoś minyło dwiesta lot od jego urodzin, dziecka ze szkoły nr 27 z Chwalyńcic przigotowały piykne wystympy powionzane z tym pisarzym i z jego piyknymi bojkami. Mie zaprosiła dyrektorka tyj szkoły, żebych poczytoł dzieciom jako bojka Andersena. Podziwioł żech do kupy z zaproszonymi rodzicami i bibliotekarkami z nikerych rybnickich szkoł pomysły naszych dzieci. Miały zrobiono wielko ksionżka z kartonu, dużo wiynkszo od uczniow, kerzi poprzeblykani w rostoliczne postacie z bojek Andersena udowali, iże śnij wyskakujom.Przipomniały mi sie zarozki wszystki te bojki, kere mi tyż dycko starka czytała za dziecka i do dzisioj nikere śnich znom na pamiyńć, tak fest mi sie podobały. Pamiyntom, jak my płakali z siostrziczkami nad „Dziołszkom z zapałkami” abo jacy my źli byli na ta diosecko „Krolowo śniegu”, że porwała Kaja.Z tego spotkanio w szkole we Chwalyńcicach doszoł żech do ciekawego wniosku, że w dzisiejszych czasach komputerow i inkszych nowoczesnych graczek dziecka słuchały z otwartymi gymbami czytano przezy mie na zakończynie tego spotkanio bojka. Totyż pamiyntejcie, że werce roz za czas wziońć ksionżka z bojkami do rynki i dzieciom swojim – czy tyż wnukom – poczytać. Widać, że dzieciom tego fest brakuje.Żeby wom dać okazjo do czytanio, postanowiył żech jedna z bojek Andersena przetłumaczyć na ślonsko gwara i wtedy bydzie podwojno korzyść. Dziecka bydom miały bojka i trocha nauki naszyj godki, kerom łosprowiali nom starziki. Bydzie to bojka pt. „Brzidkie kaczontko”, kero pokoże sie w poru odcinkach w nastympnych numerach „Nowin”, a bez feryje bydzie możno trocha czasu i do czytania, i do słuchania.
Komentarze