Afro strziga
Afro strziga


Pisoł żech już o Utopku z Nowyj Zelandie, kery sie tam Taniwha nazywo. Teraz wom połosprowiom o afrykańskij strzidze, o keryj bych sie możno nigdy niy dowiedzioł, keby niy ta nowoczesno graczka, jakom jest komputer. Pora lot tymu z dwoma kamratami założyli my klub internetowy Ślonsko Lauba i na dzisioj jest nos tam bez piyńćdziesiont członkow z cołkigo świata. Jest tyż w tyj ferajnie Tonik Syrzysko, urodzony w Rydułtowach, kery od 1981 roku miyszko w Afryce Połedniowyj. Pojechoł tam za chlebym jako młody karlus, do roboty na afrykanersko gruba. Tam poznoł swoja babeczka, kero słowa po naszymu niy rozumiała, ale urodziyła Tonikowi trzech chopcow i tam teraz jest jego miejsce i dobrze mu sie tam wiedzie. Nauczył sie karlus afrykanerskij godki, a swoja babeczka zaś nauczył trocha po naszymu godać. Stynskniył sie jednak za Ślonskiym i przilecioł na domowizna na byzuch. W zeszło środa trefiył sie z nami w knajpce U Wośka we Chwalyncicach, kaj łosprowianiu niy było końca. Toni nom łosprowioł o swojij robocie i czornych nyjgrach-bergmonach, kerzi nawet spod brauzy z warzity czorni wylazujom. Śmioli my sie jak diosi. Łosprawioł nom tyż o afrykanerskich straszkach, ale za dużo tych mian wymiynioł i taki, że se idzie jynzyk połomać. Jedne miano żech yno zapamiyntoł, bo dostoł żech na pamiontka tako figurka – totym afrykanerski i nazywo sie Zulejka. Dziecka afrykanerskie fest i przajom, chocioż to tako jak u nas Strziga, tela że czorno. Tonik swojim chopcom, jak byli mali, łosprowioł dycko bojki o utopkach, kere mu jego starzik opowiadoł, zaś jejich mama łosprowiała im bojki o Zulejce. I powiydzcie, czy to ni ma fajnie...? Na drugim końcu świata znajom bojki o naszych utopkach, zaś my teraz wiymy o afrykanerskij strzidze Zulejce, kero se możecie na obrozku obejrzeć.UTOPEK

Komentarze

Dodaj komentarz