Fajnie tak pedzieć, nowe ksionżki...! Kogo stać na nie, to mo nowe, a kogo niy stać, to cołki rok bydzie mioł komedyjo z uczyniym. Jak tak słysza od krewnych i znajomych, jako to dzisioj wyglondo z tym zaopatrzyniym dzieci we wszystko, co do szkoły potrzebne, to mi sie przipominajom ciynżkie czasy powojynne. Wtedy książki dostowało sie w szkole i chocioż niyroz były drukowane na lichym papiorze i czynsto niy były ani kartki porozcinane, to jednak były na tela tonie, że prawie kożdego było stać je kupić. Wiela to uciechy było, jak sie poczuło ta nowo farba drukarsko przi szkartowaniu. Ciekawiyło nos, co tyż bydymy sie uczyć w tyj wyższyj klasie. Było tyż tak, że brakło dlo wszystkich dzieci nowych ksionżek, ale wtedy rechtorki zbiyrały zeszłoroczne ze starszych klas i jakoś te dziecka dycko ksionżki miały.Pamiyntom, jak w jednyj klasie tyż mi trefiyło stare ksionżki dostać i potym w doma wszyjscy my mieli uciechy co niymiara przi ich oglondaniu. Ksionżka do matymatyki była cołko poszkryflano i nikere zadania tekstowe były już wyliczone, toż sie to przidało, ale zaś brakowało nikerych kartek i musieli my sie z kolegami wymiyniać i przepisować te brakujonce strony. Nojwiyncyj jednak uciechy było z ksionżkom do historie. Kaj yno był na obrozku Stalin, to mioł domalowano broda i brele, że go poznać niy szło. Zaś Bierut był przerobiony na Marksa, a Cyrankiewicz mioł pełno szkutow na łepie, że na pewno by sie uradowoł z takigo wyglondu. Cołko wielko gumka „Myszka” żech wyrajbowoł, zanim te wszystki pokryklane malonki wrociyły do jako takigo wyglondu. Jedyn obrozek ze Stalinym musioł żech yno zaklejić wystrziżonym z gazety generalismusym, bo mioł brele z takom grubom oprawkom, namalowanom kopiyrokiym, że przi gumowaniu zrobiył żech dziura w stalinowych oczach i wyglondoł na straszka. Rechtorka, co nas uczyła historie, roz wziyna moja ksionżka, otwarła jom gynał na tyj stronie i pyto sie, czamu tyn obrozek jest taki poklajstrowany. Musioł żech i to opowiedzieć i potym cołko lekcja, co na mie wejrzała, to zdało sie, że śmiychym forsknie, ale jakoś z biydom sie postrzimała.Szkoła żech skończył, chocioż czasym ze starych ksionżek sie uczył. Ludziom, kerzi chcieli tyn świat przewrocić, malowali my brele, żeby przejrzeli na oczy, a dzisioj ni ma nawet komu tych breli domalować.UTOPEK
Komentarze