No ja, pomału to już pódzie yno w ogrodzie zoologicznym kokota posłuchać. Mało kto już dzisioj kokota trzimie, bo kury i bez niego umiom sie obyńść, a te na tych fermach to tak niy piejom, bo som pozawierane. Jak naschwol w telewizorze żech oglondoł program, jak jedyn gospodorz z Chabowki, kole Nowego Targu, musioł zapłacić dwiesta złotych mandatu za kokota i to tyż cwerglika. Jednyj ze somsiadek niy spodoboł sie na pewno jego głos i poszła sie poskarżyć na policyjo, że rano niy poradzi spać, bo budzi jom piocie kokota za płotym. Niy było mowy, żeby policyjant odstompiył od strofy, choć gospodorz sie tłumaczył, że trzeba by było teraz wszystkim psom na wsi zakozać szczekać, kotom miauczeć, baranom beczeć i srokom skrzeczeć.No i powiydzcie sami, czy to ni ma cyrk? Za chwilka jeszcze Syjm uchwali ustawa, że wcale na wsi niy wolno bydzie żodnyj gadziny chować, bo niy dość, że butluje, to jeszcze smrodzi.No ja, te czasy już downo minyły, kiedy ci, co rzondziyli Ślonskiym, kupowali nawet kozy, żeby biydocy mieli jako żywicielka. Trowy po rantach niy trza było kosić i na kraju lasow niy było tela charpyńci jak teraz. Gyńsi i kozy wszystko wykosiyły. Kokoty zaś pioły na cołki karpyntel i żodnymu to niy przeszkodzało. Padoł bych, że nawet pomogało, bo niyjedyn rano stowoł podług kokota. Pamiyntom, jak stary Aleks, co na Silyjzi robiył, zaspoł do roboty, bo kokota mu jedyn WF-emkom przejechoł, a budzik mioł fedra strzelono i stoł na wertiku yno na ozdoba.To je gupota, żeby za kokoty sztrofy płacić, bo ludzi szteruje piocie, ale łoni sami koszom trowa w zegrodzie takimi piekelnymi maszynami, kere butlujom choby motory żużlowe.Trza bydzie kokota zagorgolić na niydzielny łobiod, bo jeszcze kogo rano obudzi, a dwiesta złotych mie w kapsie niy świyrzbi, coby sztrofa zapłacić.UTOPEK
Komentarze