Tak po prowdzie, to żech ani wiela niy wierziła, że to chyci, ale dziecka ȏ tym delszy czos pamiyntały. Roz za czos dostowałach kartki ze wierszykami a malunki, a sama, żech tyż ich trocha rozdała! Nojwiyncy żech sie jednako uśmioła, jak mōj przibrany synek koniecznie chcioł mi zrobić uciecha, ale wymyślani wierszyka szło mu ciynżko. Bezto z naszyj domowyj bibliotyczki wyciōngnoł ksiōnżka ze wierszami, co żech ich miała ȏgrōmnie rada a jedyn cołki przepisoł na kartka i sie pod nim podpisoł. Chocioż wierszyk niy pasowoł do sytuacyji, synek skutek ȏsiōngnoł, bo jo żech sie ȏśmioła! Aż żol mi bōło, że musiałach mu potym pedzieć, że tak sie niy robi!
Jak żech za bajtla niyrada szła kaj ze starkōm, dycki mi przipōminała:
- Dziołcha, jak komu niy przajesz, niy pokazuj mu krziwyj gymby, a zamiast padać mu co złego, lepi życz mu „dobrego dnia”, bo taki czowiek bardzi go potrzebuje niż ty!
Troszka mi to zetrwało niż żech pokapowała ta starczyno filozofijo, ale jeji rady mi sie potym czynsto we żywocie przidały!
Na poczōntku dziewiyndziesiōntych lot potrzebowałach trocha przirobić, a założyłach „działalność gospodarczo”, bezto musiałach wiela łazić po urzyndach a tam siedziały taki paniczki, co nikedy poradziyły być fest niyfajne! Moja mało cera niy mogła tego dycki zdzierżyć, a jedyn roz, jak my już wychodziyły, padała na cały głos:
- Mama, po co chodzisz do taki babochy...
Na drugi roz miałach strach tam iść, ale paniczka urzyndniczka była cołkiym fajno, widać se wziena do serca to, co maluśko padała! Ale jo raczyj kaj sie dało, stosowałach filozofijo ȏd moji starki. Jak kiero paniczka wyskoczyła na mie z gymbōm, jo ji jeszcze podziynkowała za informacyjo, a życzyłach „miłego dnia”. Ze poczōntku to sie te baby dziwały na mie, jak na jako waryjatka, ale potym wiela razy mi tyż same ȏd sia co doradziyły.
Widzicie ze tego, że to rychtik działo, bezto radza Wōm: sprōbujcie kerymuś, co wos czasym wkurzo, pedzieć „miłego dnia”, to wiela niy kosztuje, a zarozki sie ciepli ȏd tego jednymu i drugimu na sercu zrobi!
Grymlino
Komentarze