post image
Arc Elżbieta Grymel Krokusy zakwitają wczesną wiosnę

Kalyndorzowo zima ledwie sie zaczła przed Godnimi Świyntami, a tu za niycołki miesiōnc, na świyntyj Agneszki, co przipado dwadziestego piyrszego stycznia ludzie wymyśleli taki przisłowi: „Świynto Agneszka wypuszczo szkowrōnka ze miyszka”.

Trocha prowdy we tym je, bo żech sama za bajtla widziała szkowrōnki na poczōntku lutego, ale wtynczos bōła ȏgrōmnie ciepło zima. A po drugi ciynżko je dać pozōr, że te szkowronki już do prowdy sam sōm, bo to je ptok, co rod siedzi przi ziymi, a usłyszeć go mogymy yno na wiosna. Po trzeci ȏne niy ȏdlatujōm aż do Afryki, yno tam, kaj je troszka ciepli, choćby do Madziarōw, to nazod ni majōm daleko. A po szczworte, teroz te mōndre panoczki ȏd ptokōw godajōm, co szkowrōnki tak zmōndrzały, że zamiast furgać kaj daleko we bliskości miastōw zimujōm, bo tam je jodła zatela! Mōj starzik, co fesztrym bōł, a na ptokach sie znoł, dycki mi godoł, że te podane na szkowrōnka ptoki, co zimujōm wele wielgich aglomeracyji, to sōm ptoki, co sie po polsku mianujōm dzierlatki, ale jako im je po naszymu, tego niy wiym!

Na drugi miesiōnc, we lutym zaś mōmy ta sama lajera, bo godo sie, że „na Macieja (kerego przipado dwadziestego szczwortego) je wiosny (lata) nadzieja”. Tymu to sie jednako troszka dziwuja, bo jako mogymy myśleć ȏ wiośnie, kej na ȏkoło mōmy śniyg a mrōz aże trzeszczy? Ale ludzie już tacy sōm, powiysz: czorne, to ȏni: biołe, dycki nasprzyk! Ze drugi strōny trza prziznać, że tako dłōgo zima sie norodowi z czasym zmierznie, a skuli tego za słōneczkiym a ciepłym ludziōm je tesno, bezto sie ich już doczkać niy poradzōm!

Potym dwanostego marca mōmy św. Grzegorza, już isto wiycie, co chca pedzieć? Ano: „Na Grzegorza idzie zima do morza”! Mōj synek sie narodzioł drugigo marca, bezto tamtyn rok dobrze pamiyntōm. To bōło we niydziela, słōneczko gryfnie świyciło a na dworze wōniało wiosnōm, ale za trzi dni prziszła tako fujawica, że na piyńć krokōw niy bōło widać, a ȏstro zima trzimała jeszcze do poczōntku kwiytnia!

Sami widzicie, że we tych przisłowiach wiyncy je nadzieje a pobożnych życzyń, jak tyj prowdy, ale inakszy jakby my tyj wiosny doczkali?

Grymlino

Komentarze

Dodaj Komentarz