Przipomniało mi sie zaroz o „Elwrach”, o kerych mi dycko starka opowiadała. Byli to bezrobotni, kerzi tyż dostowli pora groszy zasiłku, a że wypłocali im to w jedynostego kożdego miesiąca, to ich nazwali „elwrami”, od nimieckigo liczebnika „elf”(jedynoście) Na rzut karny tyż sie godo na Ślonsku elwer, ale to już inksze znaczynie.Elwrom - tym bezrobotnym – tyn zasiłek nie styknył ani na tydziyń, to tyż musieli inaczyj szukać piniyndzy na utrzimanie siebie i cołkij rodziny. Sznupali po hasiokach, zbiyrali wongel na hołdach, grali pod oknami na rostolicznych instrumyntach, śpiywali i najmowali sie u ludzi do robot za pora groszy. Byli jednak tacy, kerzi lekszego końca dycko szukali i woleli chodzić po fechcie, abo tyż nabiyrali porzondnych ludzi na cygaństwa, a czynsto kradli co popadło. To tyż słowo „elwer” dycko przipisywane było złodziejom, lompom, miglancom i chacharom, chocioż byli tyż porzondne „elwry”.Jednym takim znanym rybnickim elwrym, był Harypil, o kerym żech już niyroz pisoł w tym mniejscu. Idzie pedzieć, że mioł swoja klasa. Na kożdy dziyń, to oblyczkom sie tam wiela niy odbijoł od inkszych elwrow i tyż czynsto najmowoł sie do sciepowanio wonglo do piwnicy, abo tyż na tym browarskim kuminie konsztiki pokazowoł, ale mało kto wiy, jaki mioł pomyślonki. Mioł wom tyn diosek w doma ancug i czorny cylinder, kery erbnył po jednym urzyndniku z magistratu. Dostoł go od wdowy po nim, bo i dycko schranioł wongel i na torg po gymiza lotoł.W niydziela sie piyknie wystrojił i po sumie szpacyrowoł po mieście jak panoczek z kryczkom i syjmowoł przed kożdom spotkanom niywiastom swoj cylinder i kłanioł sie jak grof. Potym poszoł na obiod do Świyrklańca. Kelnery jak ujrzeli takigo sztajfiyry w cylindrze, to skokali kole niego naokoło i do stoła kludziyli. Siod se Harypil za stołym i wybroł z karty takie jodło, kere yno lepszo sfera jadła. Pod kark se zawionzoł bioły laclik, żeby sie niy pokidać i chytoł sie jedzynio. Jak już było tak daleko, że wszystko spucowoł, yno trocha zimiokow i kapusty zostało, to wyciongoł z puciynki zdechłego szwoba i zgrajfnie pod zimioki wstyrczył. Wołoł potym kelnerow i pokazuje im co mu to dali do jedzynio.Toż przeproszaniu niy było końca. Nic niy płaciył i jeszcze prosiyli go na drugo niydziela przyjść, żeby na koszt firmy jako odszkodowanie, zjeść dobry obiod.Tak Harypil wszystkie rybnickie restauranty nabroł, a potym prziszoł dran na Raciborz. Tam jednak poznoł go kelner, kerego wyciepli z jednego szynku w Rybniku i za szkrabikel wysmyczył Harypila.Utopek
Komentarze