Maslonka
Maslonka


Pisali o obozie harcerskim czy koloniach i co tam robiyli. Ci, co byli nad morzym, chwolili sie, że kożdy dziyń szli sie kompać i skokali przez wysoki fale, chytali te galaretowate meduzy i zbiyrali muszelki na plaży. Pamiyntom, że takich opowiostek morskich w naszyj klasie było dycko nojwiyncyj, bo tyż nad morze w tych czasach jeździyły dzieci, kerych łojcowie na grubach robiyli. I łone przeważnie na jedne kopyto wszystko pisały, totyż yno te piyrsze zadanie my słuchali z ciekawościom, bo potym sie mierzło słuchać.Tadek dycko jeździył na obozy harcerskie i wszyjscy my czekali, aże na niego dran przidzie. Roz napisoł, jak grali w zdobywanie chorongwie w gorach kajś kole Żywca i jednyj dziołchy ugryzła żmija. Noga i zawionzali chustkom harcerskom i gibko jechali śniom na forze z jakimś chopym do miasta po zastrzyk. Zaś Aniela napisała, że cołki feryje i przeleciały na bawiyniu dziecka u ciotki w Katowicach i dostała za to nowe szczewiki. Wszyjscy my je oglondali, bo pedziała, że to te, kere mo na nogach. Ziguś zaś napisoł, że jeździył koniami u pamponia i tyż se zarobiył na zimowe szczewiki.Nojwiynkszo niyspodzianka swojim zadaniym zrobiył nom roz Jorguś, kery nigdy niy poradziył nic ciekawego napisać, bo nikaj niy jeździył, chodziył yno na połkolonie do szkoły. Ale teraz napisoł nojśmiyszniejsze zadanie. Cołko klasa sie tak chichrała, a nasza rechtorka sie aż za brzuch trzimała. A było to tak:– Dycko żech mioł nerwy, że ta pani z połkoloniow koże nom po łobiedzie godzina leżeć na dece w klasie. Wszyjscy muszom być cicho, a jo ni mom takij natury, żeby nic niy robić i chcioł żech jom roz wystraszyć żabom, bo wiedzioł żech, że sie ich boji. Rano przed połkoloniami mama posłała mie po maślonka do Keśki i jak żech szoł nazad, postawiył żech blachowka z maślonkom na ziymi i wloz żech do przikopy, coby żaba chycić. Żaby jak na złość żech niy umioł łapnyć i wylazuja pod tyn beszong, a tu blachowka sie przewraco i maślonka sie wyloła prosto na mie. Okozało sie, żech jom na kretowinie postawiył i kret jom przewrociył.W doma żech jeszcze nachytoł za to, jak żech powiedzioł prowda, a starka pedziała, że Ponboczek mie skoroł. Na bezrok już na połkolonie niy pojda, bo pojada do drugij starki do Kamiynia krowy paść.UTOPEK

Komentarze

Dodaj komentarz