Kożdy na wyścigi, chcioł pedzieć, co skuli tej ekologije robi. Modo baba po prawej stronie padała, że już downo niy myje garcōw pod kokotkym a po robocie dobrze kokotek zakrynco, coby woda sie niy marnowała. Starszo paniczka wele ni godała, że myje puszki a plastikowe puciynki niż ich wyciepnie, bo inakszy by śmierdziały, a to jeszcze keryś musi przerobić!
Panoczek, co stoł wele dźwiyrzy, padoł, że mo chałpka na wsi a chyto deszczowo woda do podlywanio zegrōdki. Paniczka Zofijo, co jōm znōm już pora lot, pokwoliła sie, że mo ekologiczno spłōczka przi haźliku, co biere mało wody! A potym spytała sie mie, co jo robia? Ale jo żech Ameryki niy ȏdkryła, bo mōj ślubny już kupa lot nazod (niź ludzie zaczli te śmieci ekstrować) zbiyroł a porzad jeszcze zbiyro we pywnicy te plastiki, blachy a kolorowe cajtongi, bo tym sie u nos we piecu niy poli. Piec tyż mōmy ekologiczny (tak mu godajōm!), bo w nim niy do sie polić bele czym! Na dachu postawiyli my se dwa solary, co nōm we cieplyjszy czos grzejōm woda do mycio a kōmpanio. Wszyjski resztōwki ze kuchynie, co sie niy nadowajōm do dōmowej zwierziny, wynoszymy na kōmpostownik, a potym mōmy czym suć pod strōmy na zegrodce, a tych chymicznych prochōw kupować niy muszymy…
- A jo tego wszyjskigo niy robia a ni mōm! – przerwoł mi mody karlus, co sie cołki czos przisłōchowoł naszyj godce. – A wiycie, że je mi s tym dobrze! Ni mōm starości a mōm świynty pokój!
- Pierdoły synku fanzolisz! - wkurzył sie tyn chop, co zgasioł światło. – U mamulki we kapsie siedzisz, a nic cie żywot niy kosztuje! Pōdziesz na swoji, to se ȏ ekologiji przipōmnisz!
A sam mioł prawie: co niy kosztuje, tego sie niy szanuje! Ale nojważniyjsze je, coby jeszcze ludzie chcieli wiyncy robić niż godać a zaczli inakszy myśleć! Bo tego niy robiymy, coby sie kwolić przed światym, yno do nos , naszych dziecek a naszych wnukōw.
Grymlino
Komentarze