Jedyn mōj znajōmek, co mu Waldik je na miano wygroł 20 lot nazod rajza do Francyje. Ȏgrōmnie sie skuli tego radowoł, a nojwiyncy mioł uciechy, że tyn wyjazd bōł yno do jednego. Chocioż roz niy musioł brać na wywczasy swoji babeczki Irki, jeji mamulki Tilki a swojich dziecek, co mu bez cołki rok nad uszami brzynczały!
Teroz to jo se ȏddychna! - radowoł sie w duchu, ale macha robiył markotno, że swoji familiji do Francyje wziōnś niy poradzi.
We autokarze Waldek siedzioł ze takim jednym naszym chopym, co sie go sztyjc gupoty trzimały, a ku tymu jeszcze rod śpiywoł, a wice godoł! I tak se do gustu fest przipadli, bezto bez cołko rajza trzimali sie społu. Połno fotografiji natrzaskali, coby se jejich familije tyż chocioż trocha tyj Francyje mogli ōbejrzeć! Ȏstatni dwa dni mieli se ȏdpocznōnć nad morzym. Czas bōł piykny, na plaży piosek bioluśki a ciepły! Jak kery ni mioł rod słōneczka to sie mōg pod taki elegancki namiot skryć, a tam wszyjskim dowali taki śmiyszne „drinki ze papiorzanym paryzolkym”.
Jak sie ȏba chopy piyknie na słōneczku wygrzoli, a potym pora tych drinkow wypiyli, zachciało sie im do hajźlika! Jak szli nazōd dali pozōr, że dali je jeszcze jedna plaża, yno że je płotym ȏgrodzōno, a ludzi tam ani wiela ni ma. Waldikowymu kamratowi zaroz gupoty zagrały, a Waldik tyż niy bōł ȏd tego, a że ȏba byli jeszcze doś mode, to płot roz-dwa przesadziyli a za mōment byli po drugi stronie. Jak poszli kōnsek dali, to sie dziepro kapli kaj trefiyli: to bōła sago plaża! We hotelu słyszeli, że sztrofa sie płaci, jakby sie tam we batkach łaziyło. Rezykować niy chcieli, bo tyj waluty za wiela ni mieli, a ȏstać tam, coby wszyjstek ȏdrobić, tyż im sie niy widziało, bo jak sie potym nazōd do dōm dostanōm? A jeszcze ani słowa po tym francusku niy poradziyli, ani niy rozumieli. Nazōd uciyć sie niy dało, bo akuratnie za płotym szli te francuski szandary, no to ȏni batki we piosku zakopali a sagusōw udowali. I nawet sie im tam widziało, bo widoki piykne mieli, ale gorzi bōło potym, jak trza bōło batki wykopać ze piosku. Waldik swoji znod roz-dwa, ale jego kamrat straciył aże trzi godziny, bo se niy zaznaczoł, kaj batki skowoł, a we tych galotkach mioł paszport!
Jakbych jo taki przigody miała, to bych sie fest zagrzoła, a Wy?
Grymlino
Komentarze