post image
Pxhere.com

Jak taki chop wyglōndo to kożdy bajtel wiy: mo czorne galoty, szaket, a sztajfhut, a na puklu niesie dycki drōcianny pucer do kōminōw. Musi być mody, bo we tym fachu trza sztyjc po drabinach a dachach skokać! Bo przeca te kōminy, co trza przepucować, dycki sōm na dachu ȏd chałpy. Niyż sie taki majster zestarzeje tak, co już na dach niy wylezie, to se musi nojprzōd wychować pora modych kōminiorczykōw, coby mu we robocie pōmōgali. A to ni ma tak łaps, bo taki mode synczyska co kwila cosik wynajduszōm!

Jedna tako historyjo żech słyszała, jak żech bōła bajtlym! Tyn majster kōminiorski to już bōł doś stary chop, a mioł trzech uczni. Możnej im za wiela zwole dowoł, ale synczyska na robocie sie znali. Te dwa starsze to byli robotne a posłōchliwe synki, ale tyn nojmodszy uczyń to bōł ȏgrōmnie zgniyły a rod yno na leki piniōndze zaglōndoł! Roz mu sie powiodło a dostoł pora zlotkōw za to, że wymiot kōmin sōmsiodowi. Tydziyń pryndzy sōm pōn majster tym kōmin wymiatali, a dali się we piecu szpetnie polyło.

Cołki kurz szeł na izba, a wszyjstek w dōma śmierdziało jakby bōło uwyndzone! Gospodorz kozoł se zawołać tego modego kōminiorczyka, a ȏbiecoł mu mu pora złotkōw, jak mu tyn kōmin porzōndne przeczyści! Mody wloz na dach wziōn kōnsek kija a zaczōn we tym kōminie szturać. Ȏroz cosik trzasnyło a na izba na dole wysuł sie wielgi kyns sadze! Teroz gospodorz mioł we chałpie niy yno wszyjstek wyndzone, ale tyż czorne! Jednako cuk we kōminie noreście sie znod!

Tyn modziok padoł, że praje cołki musioł wlyź do tego kōmina, bo tam wpadło wrōni gniozdo, a sie zaklinowało i ciynżko go bōło wytargać! Chop mu isto uwierził, chociaż to bōło cygaństwo, bo mu jeszcze złotek dołożōł. Kōminiorczyk chcioł se leko przirobić, a tyn trik zaczōn stosować po cołki wsi, ȏroz wszyndy we kominach bōły wrōni gniozda! A ludzie mu wierzili. Dziepiyro farorz, co rod po nocy szpacyrowoł po wsi, tego gizda „przifilowoł”, jak na dachy właził a kominy ludziōm zatykoł. Psy na niygo niy szczekały, bo tyn gizd bōł swōj! Jak go farorz pomianōwali, to mody tak sorkoł, że wszyjstek ȏstawioł, a wiyncy go żodyn we wsi niy widzioł, bo bezmala wynios sie do miasta, do cołkiym inkszego majstra. Ale jak dali bōł taki kōmbinator, to niy wiadōmo wiela tam wytrzimoł!

Grymlino.

Komentarze

Dodaj Komentarz