Alojz na zolyty
Alojz na zolyty


Godom, toż podź Ziguś do kawiarnie, trocha se pogodomy, kiej my sie tak downo niy widzieli. Siedli my se oba w piyknych wiklinowych zeslach, zamowiył żech kawa i tak se łosprawiomy o młodych latach. Za chwilka do drugigo stolika siadło trzech panoczkow, kerym żech tak na oko liczył kole siedymdziesiontki. Tak głośno zaczli godać, że my z Zigusiym już ni mieli co dalij wspominać, yno zaczli my ich słuchać. Nojprzod godali o tym, jak to tyn nasz Rybnik coroz piykniejszy i tela zaś nowych rzeczy stawiajom. Potym uznali, że piyknych czasow sie doczekali. – Jo jak sie siedna na rynku na ławce – pedzioł jedyn – to poradza i tak trzi godziny przesiedzieć. Na młode frelki to bych cołki dziyń mog zaglondać, taki piykne. Bez lato to na poł sebleczone chodziyły, te brzuchy gołe, a w pymkach majom jakisik broszki wstyrczone, jak słońce zablynduje, to zasztralujom, aż sie w oczach miechce. Tyn drugi pado: Hajnel, ty gupku i ciebie sie to podobo? No ja, 50 lot tymu, jak żeś był młody, tego niy było, toż sie teraz raduj i napaś se te swoji ślypia, wiela ujrzisz, to twoje, bo młodość sie już niy wroci.Tak se bele co rajcowali, aż ruszyło tego trzecigo, kery wytar nos serwetkom i godo: Chopy...! To je wszystko nic, wy sie yno radujcie, że teraz som taki dobre lyki na ta naszo chopsko słabość. Urolog mi przepisoł taki fajne pigułki, że bych brykoł jak młody źrebek. Staro mi pedziała: chopie, czy ci czasym w dekel niy piere na starość? Godom wom, piyrwyj takie chopy jak my to siedzieli w koncie izby i rzykali i godzinki śpiywali, a my jeszcze poradzymy.Jo im tyż trocha dopingowoł, ale w końcu godom: – Mocie recht chopy, ale pamiyntom, jak żech był młody, to kole nas miyszkoł stary wdowiec, mioł kole osiymdziesiontki i dwa razy w tydniu chodziył na zolyty do Stazyjki. Starka go dycko napasztowała, jak szoł wysztiglowany z kryczkom w rynce i zakurzonom fajom. Alojz, po co ty tam idziesz do tyj Stazyjki, co ty tam tela mosz do godki?No chyba sie Maryjko mylicie, jak myślicie, że my tam yno godomy abo rzykomy. Rzykom yno w doma na wieczor, ha, ha, ha!Toż widzicie chopy, teraz wiycie, że tak to źle downij niy było, choć niy znali wtedy tych modrych pilow ani inkszych nowoczesnych medikamyntow.UTOPEK

Komentarze

Dodaj komentarz