Jaki dwa tydnie tymu Zofijka musiała jechać służbowo do Warszawy, totyż Walduś odwioz jom wczas rano na banhow. Nazod przejyżdżoł kole targowiska i wspomniały mu sie czasy, jak w akadymiku dycko z Zofijkom kucharzyli. Smakowała i zupa ze swojskigo kokotka z nudlami, kere tyż sami robiyli z jajec prziwiezionych z domu. Pochodziył Walduś z kieleckij wsi i jak yno sie w doma pokozoł, to mu mamuliczka tela tego spakowała, że dwa tydnie mieli co jeść. Totyż teraz sie wiela niy zastanawioł, yno skrynciył w boczno uliczka, zostawiył tam swojigo malucha i poszoł ku sztandom. Musza zrobić Zofijce niyspodzianka, powiedzioł se som do siebie. Gibko trefiył do pamponia, u kerego niyroz kupowali jajca, ale teraz go naszło, żeby żywego kokotka kupić. Chłop wcis mu aże dwa kokotki. Tak mu to rozgodoł, że mu spuści, ale niych weźnie oba, bo to som łostatnie z jednego gniozda.Jak już był w doma, to mu sie wspomniało, że przeca nigdy w życiu kokotka niy zbijoł, ale widzioł, jak tata to robiył. Dobra, ale skond tu wziońć gnotek i sikiyrka. Wyciongnył jednego kokotka z kartonu i poszoł śnim na balkon. Na sztwortym sztoku to go tam żodyn niy podejrzy, bo to łostatni sztok. Młotkiym te kokotki głuszył i tasakiym zagorgolił. Krew sikała naokoło i piora furgały, a tu trza jeszcze te bachory wysnorzić. Spoźniył sie do roboty dwie godziny i na dokłodka musioł jeszcze szefa prosić, coby go godzina pryndzyj du dom puściył, bo musi wszystki ślady pousuwać. Przeca na wieczor Zofijka bydzie nazod.Jak malowoł emulsjom spyrskano krwiom ściana na balkonie, to z dołu somsiadka na niego woło, co sie tam u was wydarziło, bo cołki kwiotki na balkonie mo krwiom pokapane. Jak sie wychylił, żeby i powiedzieć, co sie stało, zawadziył nogom o kibelek i przewrociył go. Teraz zaś kwiotki i nawet somsiadka na odwyrtka na bioło pomalowało.Odechciało sie Waldusiowi niyspodzianek, zaklon brzidko i yno zawołoł somsiadce: niyszczyńścia chodzom parami...!UTOPEK
Komentarze