Zaroz odżyły wspomniynia z downych lot i tak se myśla, że nikere rzeczy sie niy bardzo zmieniły, choć teraz w szkołach wszystko nowoczesne, same komputery.Kasztany widać majom coś w sobie i chocioż tych naszych jeść sie niy do, jednak umiom zainteresować. Co to za uciecha była dlo nos, dziecek, jak sie te zielone, iglate kulki pokozały na kasztanowych stromach. Nie były jeszcze zdrzałe, to już my je urywali i robiyli śnich małe baliki. Brało sie taki zielony kasztan i obciyrało na cegle ta zielono skorka wroz z tymi igłami i za chwilka zamiynioł sie kasztan w malutki bronotny bal, kery wyglondoł choby zamtym obciongnyty. Ciepali my nimi do gory i w gogi grali, a rynce tyż były bronotne, że domyć ich niy szło. Jak już kasztany były zdrzałe i same na ziymia spadały, to zaś zbiyrali my te bronotne, piykne kulki i pełne kapsy du dom snosiyli. Do szkoły my dycko na roboty rynczne przinosiyli kasztany i dymbionki, a z tego robiyli my cudowne graczki i rostoliczne inksze chopki i zwierzoki.Dziołchy to tam za bardzo niy umiały z kasztanow co zrobić, bo do tego trza było konsek kozika do struganio, a łone bardzij szmatkami sie zajmowały. My zaś, synki, ścigali sie w wymyślanie takich rzeczy, że nikedy rechtorce sie niy śniło, co z takich kasztanow idzie zrobić. Nojwiyncyj jednak robiyli my kasztanowych śmiysznych ludzikow. Taki chopek mioł nogi i rynce ze sztrajchecli, a szczewiki z połowek dymbionki. Na głowie zamiast czopki mioł czasym hełm ze szupiny orzecha włoskigo, a w rynce trzimoł szabla wystrziżono z konska bristolu i siedzioł na kasztanowym koniku.Robiyli my tyż grziby i malutkie koszyczki z kasztanow, do kerych dziołchy dowały czerwone kulki z jarzombiny, kere miały udować płonki. Z jarzombiny tyż dziołchy robiyły kety dlo kasztanowych babow, kere szło poznać yno po chustce na głowie z konska szmatki czy bibułki, bo tak wiyncyj sie niy różniyły od kasztanowych chopkow.No ja, piyknie sie to wszystko wspomino, ale tak doprowdy to kasztany nom dycko przipominajom, że juzaś jedna jesiyń w swojim życiu mogymy se zaliczyć.UTOPEK
Komentarze