W Zaduszki podziwoł żech sie na ściana w kuchni, a tam se wisi starczyne mielidło na kawa. Zaroz tyż wszystko stanyło mi przed oczami, kiedy tyn młynek był kożdy dziyń w zocy. Już niy godom, że za bajtla krynciył żech niyroz dlo zabawy tom kurblom i starka mie przezywała, żebych tego po darymnicy niy psuł. Jak mi już pod nosym zaczły szkutki rosnyć i trza było sie golić, to już żech po darymnicy niy krynciył tym mielidłym, bo dycko, jak yno żech wdepnył do starki, wyciongała z bifyja tyteczka bonkawy, wsypała do młynka, a dalij już była moja robota. Woniało tom świyżo pomletom kawom w cołkij chałupie, a smakowała jeszcze bardzij. Po drugi w tych czasach, a był to rok sześćdziesionty i jo prawie z wojska prziszoł, kawy sie normalnie niy kupowało, trza było jom kombinować. Był tyż czas, że yno na kartki szło jom dostać abo za dolary w Peweksie. Starka miała dycko doś kawy w doma, bo dostowała jom w paketkach z Nimiec.No ja, dobrze, że te czasy już za nami i dzisioj tam możno mało kto o tym pamiynto. Kupujymy teraz kawa już pomleto abo tyż rozpuszczalno, a tela rostolicznych zortow, że głowa boli, a co jedna to mo być lepszo – jak wierzić tym wszystkim reklamom? Starczyne mielidło wisi yno na parada i przipomino mi sztyjc o smaku kawy i o downiejszych czasach. Krom tego mielidła som jeszcze inksze pamiontki po starzikach. Na bifyju stojom taki fajansowe kofliki z deklikami, na kerych jest napisane: cukier, grysik, mąka i sol. Z tym koflikym, kaj pisało „sol”, to tyż som miłe wspomniynia po starce, bo dycko przed Godnimi Świyntami chowała w nim mandle, kere do moczki i makowek dowała, żeby my ich nojprzod niy zjedli. Dycko żech i wszystko przesznupoł w bifyju, żeby nawiedzić ruzynki abo mandle, ale nigdy żech niy wpod na to, żeby szukać w tym kofliku, kaj dycko sol była. Jak żech już z tego szkłodzynio wyrosnył, to mi kejsik starka zdradziyła ta kryjowka i śmioli my sie długo tymu, bo od tego czasu niy musiała starka we Wilijo lotać za tymi maszkietami po pożyczkach do somsiadek.Dzisioj zaroz póda do sklepu i rozejrza sie za zwykłom, niypomlotom kawom. Tak mi przi tym wspominaniu jakoś smak prziszoł na tako świyżo pomloto tym starczynym mielidłym kawa. Zwykło, z fusami, w staryj starczynyj szolce z ubitym hynklym i kożuchym na palec grubym na wiyrchu.UTOPEK
Komentarze