Haja 1
Haja 1


Przeca w kościele jak była cicho mszo, to ministrant przed wyjściym ksiyndza dzwoniył yno roz, zaś u Pytlikow dzwoniyli sztyjc. Niyroz i poł godziny leciały pokrywki z garcow i słychać było, jak dzwoniom o delina trzaskane talyrze i szklonki. Larmo sie niosło na poł wsi, bo Maryjka dycko otwiyrała przed tym łokna dokorzond, żeby te pokrywki szybow niy wytrzaskały, jak sie Alojz schyli. Niyjedna furgała aże do zegrody, a roz nawet listonoszowi, kery drogom jechoł, czopka z łepy ściepała. Potym było u nich cicho aże do nastympnyj wypłaty i starka wtedy godała, że majom teraz „cicho mszo”, a jo gupi myśloł, że teraz cołki czas bydom po cichu rzykać. No ja, bajtle mieli inkszo starość – granie w bal, fechtowanie zrobionym ze staryj biksy kadzidłym abo puszczanie dracha na polu. Dopiyro jak my widzieli, jak Alojz jedzie na kole z roboty po cołkij drodze, to my drap gnali pod pytlikowo zegroda i czekali, kiedy Maryjka łokna bydzie otwiyrać, bo to był piyrszy zignal, że juzaś te same glyjtowane pokrywki bydom furgały miyndzy stromami i zacznie sie „cicho mszo”, po keryj na drugi dziyń jejch dzieci, Gryjtka i Hajnel, bydom zbiyrać po zegrodzie te poodbijane pokrywki. Alojz zaś po zadku miedzom z roboty bydzie jeździył bez jaki tydziyń.Patrzcie, jak to fajnie sie śmioć z inkszych i wspominać stare dzieje, a na sia niy wejrzeć. Dyć chyba ni ma takigo małżyństwa, kere aby roz sie niy przekonało na włosnyj skorze, co to rychtyk jest „cicho mszo”.Najgorzij jednak w tym wszystkim, że zaczyno sie łona od gupot: „Jo chca mecz oglondać, a niy jakisik brazylijski tasiymiec...” i potym trza chodzić kole siebie tak, choby tyn drugi tu z nami niy miyszkoł.Pora dni tymu na torgu, kole sztandu z gymizom stoł żech kole pynzjonisty, a jego baba godo: „Trzimej ty sak porzondnie, coś tak już zesłob? Musza cie na młodszego wyciupać”. Chop sie tymu ośmioł i padoł: „Kery by tyż chcioł takie stare pudło?”. Dalij już niy musza godać, kto był bardzij obrażony. Baba yno wytargała mu tyn sak z gymizom z rynki i bez słowa sztartła od sztandu, a chop za niom przi śmiychu ludzi, kerzi przi nos stoli. Na pewno w doma za to wygoroł, ale czy mieli potym „cicho mszo”, tego sie niy dowiymy.Niywiela trzeba, żeby se tako mszo fondnyć, ale jak sie zaś pomyśli o tym godzyniu, to czasym sie przido trocha haje. Po drugi zaś staro powiarka prawi: „Kery sie czubi, tyn sie lubi!”.UTOPEK

Komentarze

Dodaj komentarz