Lojzik cały czas mloł swojom klapaczkom i przezywoł na te dziki świnie, ale jak sie kyndroz do gory podziwoł na niego, to zaroz pysk zawrził, bo zdało mu sie, że go rozumi. Przeca tak wykrziwioł pysk, choćby sie śmioł z tych dwóch łeboni, kerzi sie trzimiom z cołkij siły grubego pnia.Cima sie już zrobiyło, a świnie coroz bardzij ryjom i ryjom. Już cołki okopy porobiyły naokoło dymba, gorzij niż te, kere jeszcze po Rusach w lesie łostały. – Muszymy coś patrzeć – wybebloł w końcu Zefek – przeca w doma już możno do Wilije siodajom, a my tu bydymy styrczeć chyba cołko noc, już mi sie odechciało tyj chojinki. W pazury mie uziombo, a trza sie trzimać, coby niy ślecieć. Starka mi godała, żebych se wzion makowy, to żech sie wyśmioł, a teraz by sie przidały, durch mom rynce zgrabaźniałe.– Przestoń fanzolić gupoty, lepij siongnij tyn suchy konor, kery mosz nad głowom, to ich możno z wiyrchu po uszach śmigna i wylynkom ich.Abo bydymy gwizdać na palcach, możno tego niy strzimiom? Wstyrczył zaroz dwa palce do gymby, żeby gwizdnyć najgłośnij jak poradzi. Nabroł dechu i z cołkij siły dmuchnył, aż my ślypia wylazły i czerwony sie zrobiył na gymbie, ale zamiast spodziywanego gwizdu słychać było syk choćby spod pokrywki, jak sie zimioki warzom na blasze. Wszystki świnie do gory zaroz łepy podźwigały i jak na komynda zaczły głośno fuczeć, ani by chciały go podrzyźniać.– Ty, Lojzik – padoł Zefek – dyć Wilijo momy przeca, a czy ty wiysz, że wszystki zwierzynta we Wilijo rozumiom naszo godka? Starzik godoł, że nawet umiom godać ludzkom mowom. Spróbujymy im coś pedzieć!– Te, kyndroz – zaczon Lojzik i patrzoł na ta nojwiynkszo świnia – jak długo tu chcecie nas trzimać, przeca w doma na pewno nos wszyndzi szukajom...Kyndroz sie podziwoł do wiyrchu i zaczon godać: „Wy dwa gupki, czy wy niy wiycie, czego tu szukomy pod dymbym, przeca tu som dymbionki, nasze nojlepsze maszkiety. Co my mogymy za to, żeście se na tyn dymb wleźli, downo by my was osmolyli, ale tyn dymb se dycko na wilijno wieczerzo zostawiomy...!”.Zza młodyj sośniczki blyskło światło z taszynlampy i wszystki świnie sie zaroz rozpyrskły. Teraz dopiyro ujrzeli synki Paula, kery ich z tyj biydy wyretowoł. Padoł yno: teraz gibko do chałupy, wszyjscy wos szukomy i chyba cołki rok bici bydziecie, bo kto we Wilijo dostanie lyjty, to cołki rok bity bydzie.UTOPEK
Komentarze