Wspominali my tyż nasze starki i ciotki, kerych już ni ma miyndzy nami, a kere dycko bez świynta łosprowiały nom o swojich przigodach, jak to szli z pastyrki prosto do chlywa, żeby posłuchać, co tyż bydło i gadzina łosprowio. Godom to swojim wnukom, a ci sie yno śmiejom pod nosym, widać ni majom interesy słuchać. A przeca jo w ich wieku słuchoł z otwartom gymbom o tym, jak to „Bronok” skarżył sie na starzika, że niy śloz z woza i jak on sie musioł mynczyć pod kympa ciongnyć tona wonglo i jeszcze mu biczym strzyloł kole uszow. Abo jak krasula wywołała we Wilijo na ciotka Rołza, że zamiast jom paść na łonce, przibiła jom do kolika na krotkim powrozie, a sama zolyciyła z karlusami pod lasym i nic jom niy szterowało, że cołko trowa sie skończyła kole kolika. Jak my se tak łosprowiali w nojlepsze, ktoś zadzwoniył do dźwiyrzi. Najmłodszy wnuczek lecioł obejrzeć i za chwila był nazod wylynkany. Jakeś mikołaje stojom przed siyniom – godo. Jake zaś mikołaje – godom do niego – przeca mikołaje yno w Mikołaja chodzom, ale ida gibko obejrzeć. Jak żech sie uradowoł, bo ujrzoł żech pod dźwiyrzami kolyndnikow z gwiozdom. Zaroz żech im otworził, a ci gibko zaczli kolynda śpiywać. Wszyjscy przilecieli za mnom i dziwowali my sie festelnie, że tak fajnie przebleczonych pastuszkow to my downo niy widzieli. Doprowdy moga pedzieć, że tak piyknie byli przebrani i do tego tak fajniście śpiywali, że dej Boże, żeby to juzaś wrociło, jak to kiejsik bywało. Łoński rok to niby prziszli pastuszki, ale ani to pooblykani w żodne stroje niy byli ani to śpiywać niy poradziyli, yno wielko szporkasa mieli. Zaroz żech im musioł fotka strzelić, żeby Wom pokozać, jak to idzie, kiedy sie chce. Przeca to tyż należy do piyknych zwykow i trza o nie dbać, żeby niy poszły w zapomniynie.Co to zaś potym godki było, jak yno te kolyndniki poszli. Musioł żech wnukom łosprowiać, jak my to z kamratami za bajtla tyż za pastuszkow poprzeblykani po wsiach lotali. A wiela my dycko nazbiyrali piniyndzy i rostomajntych maszkietow. Ale poprzeblykani my byli niy do poznaki. Borok Lojzik, jak roz my go czornym gutalinym na Murzina przerobiyli, to miesionc do szkoły niy chodziył, bo mu skora z gymby ślazowała. Jednak na bezrok zaś sie doł namazać, ale sadzami, bo mioł lukate włosy, paplato gymba i najbardzij mu za Murzinka pasowało.UTOPEK
Komentarze