Kaczyca
Kaczyca


Niyjedyn sie przerachował, kery liczył na lekko zima. Niy godom już o tych, kerzi miyszkajom na osiedlach i tyż teraz marznom, bo im przikryncajom. Przipominajom mi sie downe zimy, kiedy to śniega nasuło rowno z płotami, a mrozy były takie, że stromy pynkały. Na cołko zima mieli my yno dwie tony wonglo, a teraz sześć ton niy poradzi styknyć. No ja, ale wtedy poliło sie yno w jednyj izbie, kaj sie siedziało i przeważnie była to kuchnia. Stoł tam piec kachlowy z wiyszkom, na kery sie godało blacha. Jak były rychtyk wielki mrozy, a przeważnie były, to sie w kuchni stawiało żeleźniak, z kerego ruły szły nad blachom do kumina. Im były dusze, tym bardzij grzoły. Gorzij było z warzyniym obiadu, bo na takim żeleźnioku yno szło jedyn garniec postawić, a w blasze polić i w nim to by za dużo wyngla poszło. Toż nojlepij, jak tatulek prziwioz keroś zima „kaczyca” – taki piec, tyż zieleźny, ale kanciaty, co stoł na sztyrech szłapach podobnych do kaczych. Na nim szło już wiyncyj garcow postawić. Żeby zimioki gibciyj zewrały, to sie syjmowało ringi z jednyj dziury i ogiyń szoł prosto na garniec, ale potym dziołchy niy umiały go domyć, co taki był łokopcony.Użyteczne tyż w tych czasach było gacynie cołkij chałupy i okiyn, w kerych przeważnie były yno pojedyńcze szyby. Chałupy na wsiach to gaciyli przeważnie pyrzym, kery sie z pola na podzim ku chałupie prziwoziyło. Potym sie go ukłodało naokoło chałupy, żeby spodkiym mroz niy przeloz. Na łoknach tyż sie robiyło taki kastle do połowice wysokości i sie usztamfowało prziniesiony z lasa mech. Cima sie skuli tego bardzij w izbach zrobiyło, no ale za to cieplij było. I tak tam żodyn bez okno niy zaglondoł, bo były na nich namalowane same kwiotki i rostoliczne paprocie przez mroz. Jak kery chcioł wejrzeć na dwor, to se musioł dziurka wychuchać na szybie. Nojgorzij dycko było w tako zima iść do łożka, a jeszcze gorzij rano z niego wylyźć. Kożdy na wieczor broł swoja szamotowka i zagrzywoł na tyj kaczycy. Potym owiniynto jakomś chadrom wciskoł jom pod pierzina do nog, coby grzoła. Przikryci pierzinom pod uszy spali my do rana. Czekali my, aże mamulka zrobi ogiyń i uwarzi ciepłyj kawy. Niyroz my słyszeli, jak przezywo, że wody z kibla niy idzie nabrać, bo tata zapomnioł go z siyni do kuchnie prziniyść na noc i cołko zamarzła. UTOPEK

Komentarze

Dodaj komentarz