Mama nos krotko trzimała, ale jo bołach ta „czorno owca w rodzinie”, co durch sie tymu rygorowi sprzeciwiała, totyż nojczynścij żech obrywała lyjty.Kożdego roku w karnawale moji ojcowie chodzili na muzyka organizowano przez zakład taty i boły to echt fajne zabawy z orkiestrom na eleganckij sali. Jak kożdo z nos skończyła 18 lot, to mama z tatom brali jom na tako piyrszo w życiu całonocno muzyka. Kedy mie prziszło 18 lot, to tyż wiedziałach, że w tym roku ida z rodzicami na bal.Moja somsiadka boła szwoczkom i uszyła mi długi klajd. Pamiyntom, że był czerwony i obszyty cekinami. Poszłach tyż do frizjerki, a nawet mogłach sie na ta okazjo pomalować, toż sie przedstawcie, jake to było dlo mie przeżycie.Poszli my na ta zabawa do piyknie wystrojonyj sali Miyjskigo Domu Kultury w Pyskowicach. Orkestra grała i zaczło sie tańcowanie. Podług zasad moich rodzicow do piyrszego tańca poprosił mie mój tata. Musza pedzieć, że boł łon wyjontkowo dobrym tancyrzym, bo jeszcze w czasach kawalerskich wystympowoł w operetce i jakimś tyjatrze w Rybniku.Z tatom tańcowało mi sie fajniście, prowadził lekko rytmicznie, ale jak już zaczli mie zaproszać kawalery, to mi sie niy bardzo podobało, bo łoni niy umieli tak dobrze tańcować jak mój tata.Przetańcowałach już z tymi rostomajntymi synkami pora konskow i wpadłach na pomysł, że jak już keryś przidzie po mie do tańca, to powiym mu, coby tyż nojpiyrw zatańcowoł z mojom mamom, a jo gibko żech brała taty do tańcowanio.Tak tyż bez cołko prawie noc przetańcowałach z nojlepszym tancerzym tego balu. Taki był mój najpiykniyszy w życiu bal i wiela bych teraz dała, cobych mogła go przeżyć jeszcze roz i zatańcować z tym wyjontkowym nojukochańszym tancyrzym, kery myśla, że tam kajś z wiyrchu patrzy na mie i wierza w to, że kedyś zaś razym zatańcujymy.Som to autyntyczne wspomniynia piyrszego balu kamratki Joanny Żabickiej z Pyskowic, kero czyto nasza gazeta przez internet, zaś jeji tata urodził sie w Syryni i nazywoł sie Jęczmionka.UTOPEK
Komentarze