Dyskobol rybnicki
Dyskobol rybnicki


Niy była to jednak jego ślubno, ale somsiadka, kero wparziła z wielkim larmym do antryju. Pomocy Hajnelku! Mój stary sie w pomnik łobroco, cołki zesztajfnioł!– Pomalutku Alinko, dyć chyba nic sie wielkigo niy stało – uspokojoł jom Hajnel. – Twoj Eduś dycko był sztywniok, gynał by sie nadowoł na pomnik.– Ty se tu błozna sy mie robisz, a łon rychtyk jest jakiś sztajfny, ani niy dyrgnie. Już żech go probowała „Dymbowym” do kuchni zwobić i niy pomogło, a przeca som wiysz, jaki jest za piwym.Rod niyrod Hajnel poszoł za niom do siyni, a jo tyż za nimi i co widzymy, Eduś połomany jak colsztok w antryju stoji i sztajfny jakiś, choby go z gipsu odloli. Hajnel dalij myśloł, że to jakiś szpas i pyto: Co ty somsiod trynujesz jako pantomima? Nic żeś niy godoł, żeś w tyjatrze fara łapnył. Ja jo wiym, na pewno widzioł ta bioło dama w Krakowie pod Mariackim i chcesz na rybnickim rynku tak sprobować co zarobić, fajny pomysł.– Przestoń już Hajnel błoznować – godo ta somsiadka – przeca jak jo go tu zostawiła, to sie jeszcze trocha ruszoł, a teraz stoji niyruchomo ani tyn dyskobol ze starożytnyj Grecje.– Śnim jest rychtyk źle – godom, trza po pogotowie dzwonić.Ta jego baba zaroz zaczła lamyncić: – Co? Po pogotowie, a co jo im powiym? Iże mom sztajfnego w doma, przeca mi kożom po karawan dzwonić.– Mosz recht Alina! – padoł Hajnel. – To som teraz za wielki koszta. A do tego trumna i to jakoś ekstra zrobiono, bo taki pokrziwiony do normalnyj niy wlezie. Nojtonij bydzie go autym prosto do krymacje zawiyźć, dowej jako deka co go zapakujymy i śniesymy na doł.Jak Eduś usłyszoł ta nasza godka, takigo strachu dostoł, że zaroz przegodoł po cichu:– Chopy, dyć jo żyja, yno jak żech sie schylił, żeby sznurki zawiązać, to mie jakiś „heksynszus” chyciył i tak żech już zostoł. Zaniyście mie na leżanka. Tak my tyż zrobiyli, a Alinka poszmarowała go gynsinom i na drugi dziyń go puściyło.UTOPEK

Komentarze

Dodaj komentarz