Brog 1a
Brog 1a


To tyż osmego marca polecioł żech ze Stanikiym do Józika, żeby go namowić na te bose kiełzanie. Zastali my go jednak przi robocie. Brog za stodołom otwarty, józikowo mamulka ze siostrom Maryjkom wybiyrajom zimioki i zortujom na sadzoki, do jedzynio i dlo bydła. Józik te zimioki woziył na karze do stodoły. Taki brog otworzić po zimie to było wielki przeżycie, bo przeca nigdy sie niy wiedziało, czy aby kartofle niy zmarzły bez zima i czy bydzie ich dość do sadzynio i jedzynio.Jak wyglondo taki brog, to miastowi na pewno ni majom pojyncia, a i młodzi ze wsi dzisioj tyż możno niy bardzo wiedzom, o czym pisza, bo przeca teraz som na to pywnice. Wtedy mało kto mioł takie wielkie pywnice, żeby zimioki było kaj przezimować. Robiyło sie w ziymi tako przikopa na jaki trzisztwierci metra głymboko i długo na tela, coby wszystki zimioki tam wlazły. Dno i boki mościyło sie słomom i świyrkowymi chojami, kere bez mała myszy odstraszały i do tego dołu suło sie zimioki, aże sie taki czubek zrobiył nad ziymiom. Przikrywało sie to zaś doś grubo słomom i chojami, a potym przisypywało sie tom ziymiom i uklepało na wierchu. W jednym abo dwoch miejscach robiyło sie luftownik zbity ze sztyrech deseczek, kery tyż sie słomom zatykało, żeby mroz niy doszoł.Taki brog wtedy otworził tatulek od Józika i teraz niy było mowy, żeby go od tyj roboty odciongnyć. Niy trefiyło nom nic inkszego jak pomoc im przi tyj robocie, a że było to do połednia, to my myśleli, że po obiedzie bydymy w trojka kiełzać na naszyj kympie w lesie. Niy stało sie tak jednak, bo plany sie zmiyniły, ale niy skuli tego, że czasu brakło. Roz-dwa my te zimioki zwiyźli, bo jo ze Stanikiym nosiyli my w koszyku ta kupa, co była dlo bydła. Już prawie sie kończyło te wybiyranie zimiokow, jak Maryjka zawołała: „Jezderkusie! Coż to za wielki kartofel sie tu znojd?” i pokazuje nom fuzbal od Ericha, kery sie nom roz we wieczor na jesiyń straciył, a potym nos Erich wszystkich podejrzywoł, że my mu go ukradli. Co to było uciechy z tego bala, zaroz my go doplompali i gutalinym namazali, a potym Józik jechoł na kole po Ericha, kery sie nojbardzij tymu radowoł. Grali my wtedy aże do cimoka na jedna buda bez bramkorza i tak my zapomnieli o naszym kiełzaniu po bosoku.UTOPEK

Komentarze

Dodaj komentarz