Kupowanie

Najbardzij kuszom reklamy i rostoliczne promocje, a do tego na tych towarach karteczki z cynom, kaj widać przeszkryflono krziżykiym staro cyna i nowo o połowa myjnszo. Jak tu wtedy niy kupić, zaroz sie tako okazjo wykorzystuje i towor jest w koszyku, czy go potrzebujesz, czy niy. Przeca za poł cyny to czysty zysk. W doma dopiyro kombinujesz, czamu żeś to kupiył, dyć już mosz tako rzecz, yno żeś o nij zapomnioł. Niy godom o jodle, bo trza jednak dziynnie jeść i sztyjc czegoś brakuje, chocioż tyż sie człowiek skusi tom promocjom, a potym widzisz, że gwarancjo sie kończy za trzi dni, a czasym i jutro i teraz zjydz gibko sześć biksow mielonki, bo żeś jom tak tanio dostoł. A inksze rzeczy...? Potym poniywiyro sie trzi pory takich samych laczkow abo trampkow zdrowotnych. Najbardzij to przesiadujom w tych sklepach kobiytki, a niyjedna to już mo tako choroba, że musi iść coś kupić, bo jest uzależniono od kupowanio. Ni ma sie co dziwić, bo styknie yno puścić telewizor, żeby sie dowiedzieć, jaki mo mieć wymiary i wyglondać dzisioj nowoczesno kobiyta, żeby odnosiyła sukcesy. „Zmiyń fryzura i kolor włosow”, „kup u nas najlepszo odżywka do twarzy”, „zafonduj se parfin o egzotycznym woniu...” itd. Pełno inkszych reklam kusi te zarobione i potracone kobiytki, kere tyż by chciały, coby wszystkie chopy za nimi sie oglondali. A tych producyntow tych kosmetykow jest dzisioj tela co niymożno, a kożdy by chcioł swój towor pociść, toż niy dziwota, że jedyn przez drugigo zachwolo i ogupio ludzi. Chopy tyż w tyj kosmetyce niy som po zadku, bo co roncz widać reklamy: „prawdziwego mężczyznę poznasz po zapachu”, „najlepsze kremy dla mężczyzny”, „chcesz mieć powodzenie u kobiet, kupuj...” itp.Nawet jakiś chipsy i piwo yno dlo chłopow reklamujom, a o rostolicznych środkach na porost włosow niy wspomnia. Jeszcze jak sie teraz o tych wszystkich bajerach w tych telefonach komorkowych powiy, to już koniec. Co jedyn to mo inksze fizymatynta. Jedyn telefon robi zdjyncia i filmuje, inkszy mo jakiś GPS abo MP3, a na tym sie yno prawdziwe chopy znajom przeca. Toż handel kwitnie jak diosi.No ja, świat idzie z postympym i kto niy podonży, to jest stracony. Jakby teraz nasze starziki z grobow powstowały, toby sie zo głowy chytali, bo przeca najwiynkszo technika dlo nich to był zygarek Pobieda i radio Pionier, a o reklamie niy było mowy, bo yno na talony szło kupić. UTOPEK