Dycko tak przeca jest, że tyn bogaty zajonczek zawsze trefi do tych, kerzi już som bogaci, a tyn boroczek biydny hazok juzaś do biydnego trefi. Nic na to niy poradzymy, tak zawsze było i dalij tak bydzie. Mogymy yno zostać przi nadzieji, że na bezrok tyn bogaty zajonczek sie pomyli i trefi do biydoka.Co roku po kożdych świyntach przichodzi taki momynt, że ludzie sie zastanowiajom nad tym, czy aby zrobiyli wszystko, żeby sprawić uciecha swojim najbliższym i czy w cołkij tyj gonitwie czasym o czymś niy zapomnioł. Na pewno żodyn niy zapomnioł o dzieciach. O nich sie niy do zapomnieć, bo nom już długo przed świyntami przipominajom, co tyż miołby tyn zajonczek prziniyść do zrobionego w zegrodce pod krzokiym gniozdeczka. Jedyn bajtel chciołby yno pora paskudow, drugi jako graczka, a trzeci by tela chcioł, że tyn zajonczek by musioł jakim wielkim autym karować miyndzy tymi krzoczkami w zegrodzie. Kombinujymy wtedy, jak to takimu łeboniowi wytuplikować, że zajonczek niy poradzi autym kerować ani nawet prawa jazdy ni mo i yno tela prziniesie, wiela umi na plecach przitargać.Kożdy z nas kiedyś był dzieckiym i pamiynto, wiela to było uciechy przi szukaniu zajonczkowych gniozdek. Łostatnio mie starego tyż niy ominoł zajonczek, keregoch dostoł od gryfnyj dziołszki ze zdjyncio. W zeszłym tydniu był żech w naszyj rybnickij Bibliotece Miejskij na spotkaniu z dzieckami z Przedszkola nr 9. Poczytoł żech im w ramach akcji „Cało Polska czyto dzieciom” pora bojek, naszych ślonskich o skarbniku i utopcu. Dzieci były zasłuchane i grzeczne, aż sie wierzić niy chce, że tyn bojkowy świat umi tela zrobić.Za te moji czytanie i łosprowianie na końcu mi piyknie zaśpiywały i dały mi tego czarodziejskigo zajonczka. Mom se go fest w zocy i rychtyk jest to zaczarowany zajonczek, bo mi przi wielkanocnym stole przipomnioł o mojich dzieciyncych zajonczkach, kere przeważnie były ubogie, tak jak tamte powojynne czasy.UTOPEK
Komentarze