Co inkszego te starsze pokolynie. Jak żech już padoł, wiosna nareszcie momy i starziki powyłaziyli na słoneczko. Niy wszyjscy jednak majom swoja zegroda i ci, co miyszkajom we familokach, mogom se poszpacyrować po parkach abo tyż siednyć na koło i wyjechać kajś podychać świyżym luftym. Kerzi majom zegroda abo konsek działki, to teraz po cołkich dniach przesiadujom przi swojich grzondkach. Jako to jest uciecha dlo nich, to niy trza godać. Wszystko zaczyno kwitnyć, pszczoły i szmaterloki uwijajom sie przi kwiotkach, a jo se grabia, ryja, kopia, sieja, sadza, szczypia, gnoja, przicinom, a co jakiś czas troszka piwka przi tym łykna. Zaglondom tyż na zygarek, żeby niy przepasować bonkawki, kero sie pije codziynnie o tyj samyj godzinie. Zresztom ledwo człowiek pomyśli, już staro woło: podź chopeczku na kawa i niy bier se tyj roboty tak łostro, bo cie zaś chyci fonsok i bydziesz leżoł. No tak jest czasym, bo po zimie ni ma człowiek przibadany i trza se to po leku brać.Jedna grzondka na pietruszka, drugo na marchewka, trzecio na cebula, potym jeszcze na radiski, fanzole, koperek i ogorki. Groch już sie zielyni i trza patyczki za chwilka wstyrkać. Już żech go w marcu posioł – na ostatni driker, chocioż jeszcze śniyg leżoł miyjscami, ale sie udało, bo godała dycko starka, że jak zasieja w marcu, byda zbiyroł w garcu. Ziorka zielonego groszku dostoł żech od nij piyndziesiont lot tymu i do dzisioj go sieja. Jest to taki specjalny groch, kery ni mo łusek w stronkach. Za te piynćdziesiont lot jeszcze mi sie niy zdarziło, żeby go niy posioć w marcu, chocioż latoś wiela niy brakowało, żebych tyj tradycje niy dotrzimoł. Niy wiym yno, kery po mie erbnie te dalsze sioci tego grochu, bo widza, że jakoś żodyn sie niy poli do tego, za to do dziubanio – jak już wisi pełno zielonych szołtkow – to ich pełno.No ja rozgodoł żech sie o groszku, a chcioł żech jeszcze napisać o szpokach, kere sie tak waliły o kadłubek na cześni u somsiada, że oba spadły na moja grzondka świyżo zasiotyj pietruszki i durch sie czubiły na nij. Potym wparził na nie jakiś czorny kocur i nim jo dolecioł, już mioł jednego w pazurach i zaś haja na mojij pietruszce. Tela dziur mi porobiyli na tyj grzondce i tak rozkopali, że teraz niy wiym, czy pietruszka powschodzi.UTOPEK
Komentarze