Franz Josef
Franz Josef


No ja, prawdziwy cysorz austrowyngerski downo tymu umrzył, bo w 1916 roku, ale ludzie na Ślonsku Cieszyńskim, kery był pod jego panowaniym, wspominajom go do dzisioj. Do dzisioj tyż godajom na miyszkańcow Cieszyna i Podbeskidzio „Cesaroki”. Pamiyntny przijazd Franciszka Józefa I na Podbeskidzie w 1886 roku, zostało tyż łoński rok odtworzone hucznie w Skoczowie. W jego postać wcielił sie miyszkaniec Kończyc Małych kole Cieszyna, były laureat konkursu „Po naszymu, czyli po ślonsku” – Tadeusz Wojacki. Jest on przez to członkiym klubu byłych laureatow tego konkursu, „Czelodki po naszymu”, kero co jakiś czas organizuje spotkania w rostomajntych miyjscach.Tak tyż było w ostatnio niedziela kwiytniowo. „Czelodka po naszymu” została zaproszono na spotkanie folklorystyczne do Skrzyszowa kole Wodzisławia Śl. przez zespoł Familijo, znany z pielyngnowanio rostolicznych obrzondkow naszyj ślonskij kultury. Prowadzi tyn zespoł Urszula Santarius z poroma inkszymi zapolyńcami ze Skrzyszowa i robiom to tak, że yno zowiścić im takigo powodzynio i życzyć, coby dalij tak trzimali. Radzi dycko przyjyżdżajom członkowie „Czelodki” razym z paniom synator Mariom Pańczyk, skuli keryj to wszystko sie zaczło. To ona przeca, redaktorka Radia Katowice, wymyśliła w 1993 roku konkurs „Po naszymu...” i od tyj chwile krynci sie wszysko kole tyj naszyj godki i zawionzały sie taki kamractwa ani w nojlepszyj rodzinie. W Skrzyszowie „Czelodka” była już pora razy, ale dycko nos zaskoczom czymś nowym. Pamiyntom piyrsze spotkanie, kiej zaprosiła nos Familijo na wesele po ślonsku, kere było tak zainscynizowane, choby my rychtyk na prawdziwym weselu byli, tak ani by my sie cofli do downych zwykow weselnych naszych prastarzikow.Teraz honorowym gościym był cysorz Franciszek Józef I i łon tyż na poczontku piyknie nas prziwitoł ze swojom połowicom (tukej członkiniom „Familije” przebranom za „Sissi”, keryj jak widać na zdjynciu, urody niy powstydziyłaby sie ta prawdziwo).Spotkanie w Skrzyszowie odbyło sie w przijocielskij, wesołyj atmosferze, a som cysorz przyjon mie nawet na audiyncji osobistyj i kozoł Czytelnikom „Nowin” przekozać cesarski pozdrowiynie.UTOPEK

Komentarze

Dodaj komentarz