– Chopie! Kebyś tyż był taki majster jak Hajnel od Trudy, tobyś som pomalowoł izby i niy trza by sie teraz starać, za co te koło kupić. Wiysz, jak łon piyknie pomalowoł kuchnia i dwie izby som wytapetowoł. Godom ci, że ta Truda mo śnim fajnie, co chyci do rynki, to poradzi zrobić, a ty nic. Rok już siedzisz na tyj pynzyji i yno czas marnujesz, a jo musza za wszystko płacić.– Niy fanzol mi tu, trza sie było wziońć Hajnela, ni miała byś teraz po kim brusić. A jak sie rozchodzi o te gupi malowanie, to ci udowodnia, żech tyż ni ma gupszy od niego. Jutro idymy po farby i szlomkrejda.Tak tyż dwa tydnie przed komunijom chyciył sie Alojz malowanio.Szlomkrejdy niy kupowali, bo mu Ana pedziała, że Hajnel malowoł deki biołom, akrylowom farbom, a potym do reszty namiyszoł jakigoś pigmyntu i kuchnia tym pomalowoł. Toż kupił Alojz ta farba i tapeta na izby, przeca to blank ajnfach barankiym se tonkać i na żerdce deka malować, ani drabiny niy trza.No ja, tak sie yno godo, ale co potym sie porobiyło, tego Ana do końca życio niy zapomni. Jak yno Alojz zaczon ta gipsdeka, kero zawsze była szlomkrejdom biylono, tym barankiym kulać, a jak to zaczło puchnyć i całymi szkartami sie klejić do tyj rolki i spadować, to sie dopiyro zaczło przeklinanie, aże uszy puchły. Wszystko trza było dropać i drugi roz malować. O tapetach to już niy godom, same wargi sie porobiyły, a rano jak Ana stanyła, połowa tyj tapety zwisała aże ku delinie, Alojz sie znerwowoł, wszystko zostawiył i poszoł na piwo. Ana zaś gibko z prośbom do Hajnela, po nowe tapety i farba do drogeryje.Zaś wnukowi Romusiowi obiecali kupić te koło trocha niyskorzij.UTOPEK
Komentarze