Przeważnie jymy trzi razy do dnia - śniodanie, łobiod i wieczerzo. Ponikierzi próbowali już przeliczyć, wiela jodła uczyni na jednego człowieka przi założyniu, że bydzie żył 70 lot. Wyszło tego aże 10 000 jajec, 5000 pecynkow chleba, 150 miechów kartofli, 3 krowy i 3 świnie. Ku tymu jeszcze przichodzi gymiza, owoc, mlyko, kyjzy, że o maszkietach już niy wspomna.No, ale niy wszyjscy ludzie jednako jedzom. Moja starka na tyn przikłod rychtowała mało gymizów. Prawiyła, że niy je królikiym, żeby natykała zielynina. Z dziecińskich lot pamiyntom blank inksze jodło niż momy teraz. Warzyło się dania proste - żur, bratkartofle z kwaskom abo kiszkom, placki, kluski ze szpyrkoma i roztomajte ańtopówy. Miynso tyż boło, ale to już przeważnie we niydziele. Wdycki słyszałach, że takie proste jodło je nojzdrowsze, że ze żuru chop jak z muru. Czy mieli prawie ? Niy poradza uznać. Wiym yno tela, że oma dożyła 93 lot, zaś starka /prababcia/ 91.Widać jednak niy wszyjscy som tego zdanio co moje starki. Styknie yno wejrzeć do piyrszyj lepszyj księgarnie. Obadejcie wiela tam je roztomajtych książek kucharskich z tysioncami recept na jodło. Bo tyż ludzie bez wieki wynokwiali lecyjakie mimry z mamrami. Jedzynie je nojbardzij naturalnom rzeczom i na jego przikłodzie widać, jak człowiek łogup, bo niy wiy co mo jeść i czeko co by mu inksi to podpedzieli. I ci inksi podpowiadajom, no i robiom przi tymu wielkie pijondze. Na takie, a niy inksze jodło przichodzi tyż moda. Godom gupoty ? To wejrzijcie se na te nasze dzisiyjsze szynki, abo restauracyje. W jednych pizze, w inkszych dugie nudle z tomatowom zołzom, a w jeszcze inkszych plaskate karminadle wstyrknione do przerżnionyj na pół żymły abo lyngi z przipieczonymi szamponiokami. Ludzie, kierzi som zalotani żywiom się w szynkach. Powciepujom na gibko do żołondka i lecom dalij do swoji roboty. Niy wszystkich jednakowóż styko na takie luksusa. Ale i dlo nich moda prziniosła tzw. goronce kubki - sypniesz z tyteczki trocha proszku do szolki, gichniesz na to wrawyj wody i już je zupa abo inkszo ciaproka fertik. Niy wiym jak dugo ujadom na takich sztucznościach, ale miarkuja, że do czasu aż zaś cosik inkszego w świecie wynokwiom.Bez łostatnie lata przibyło mocka ludzi, kierzi z jodłym chcom mieć jak nojmyni wspólnego. Som to ci, kierzi dbajom o swoja figura. Oni niy natykajom do sia, yno trzimiom lecyjakie diety. Taki dietowy borok jy choćby wróbel chory na żołondek - wypije na śniodanie glaska rozblamburzonych szuminów z biksy, na łobiod szkubnie listek zielonego szałotu z połowkom jajca, zaś na wieczerzo popije łodciągnionego mlyka i przegryzie kiereś jabuszko. U nich tyż króluje pedzynie, że człowiek jy yno po to żeby żyć, a niy żyje żeby jeść.Trza tyż prziznać, że dzisiyjsze jodło, kiere nom sprzedujom w sklepach strach nikiedy jeść. Kupiyło by się z chynciom konszczek łowiynzigo miynsa, ale czy wiysz czy to niy ze wściekłyj krowy ? Trocha świńskigo, ale niy mosz pewności, że zjysz go do kupy z pryszczycom. Mosz smak na szłapka z kurzyńcia ? A wiysz napewno, że niy trefisz na salmonella ? Śmiejom się do nos ze sklepowych fachow krojcowane gynetycznie tomaty, szałoty z ołowiym, ołberiby z kadmym, wycihtowane na prochach łogorki i marekwie, jak tyż śledzie a la łosoś , soja a la kotlet schabowy abo napromiyniowane jabka. I powiydzcie sami, co tu jeść?
Komentarze