W historyji Rybnika tyż jest pora znanych koni. Był jedyn taki, kerego na pewno starsi rybniczanie pamiyntajom, bo przeca wygroł Wielko Rybnicko w piyńćdziesiontych latach. Odbyła sie ta gonitwa na sztadionie w Rybniku, a zorganizowoł jom niyjaki Pawletko, człowiek, kery w tych ciynżkich czasach dużo do Rybnika zrobiył i dzisioj niyjedyn by sie musioł od niego uczyć.Koń, o kerym godka, to tak doprowdy była siwo klacz, keryj było Liza. Dżokej, co na nij wtedy wygroł, był z Paruszowca i kupiył jom ze rzeźnie. Dziynki tymu, że była łona głucho, niy zlynkła sie przi sztartowaniu strzału z korkowca i szczyńśliwie do mety po żużlowym torze prziczłapała. Inksze konie rozpyrskły sie po cołkim sztadionie, a jednego to trza było dźwigiym z bandy syjmować, bo przednimi szłapami przeskoczył i na brzuchu zostoł wisieć.Były jeszcze inksze konie w Rybniku, ale juzaś niy tak znane. Były to ciynżki belgijoki, kere po wojnie zaczły służba w rybnickim browarze. Długi lata ciongnyły po mieście wielnoski rolwagi z beczkami i skrzinkami piwa. Niyroz chop, kery nimi formanił, niyjaki Mańka, broł nos łeboni na ta rolwaga i wioz na kompielisko Ruda, kaj łon piwo woziył.Jeszcze jednego rybnickigo konia bydom starsi na pewno pamiyntać. Jeździył nim formon, kery na Kościuszki miyszkoł i lata rozwoziył ludziom wongel po Rybniku, ze Składu Opałowego u Kamyczka. Był to znaczny koń, fest w krziżu wygnyty, chned brzuchym po asfalcie pisoł. Krom tego znacznego feleru to był koń, co mioł inkszych pod sobom z rozumym. Dziynnie po robocie formony popijali u Kamyczka. Tak sie skłodało, że tyn formon od tego krziwego konia był dycko nojbardzij naprany, ale mog se na to pozwolić, bo mioł mondrego konia. Dycko go szczyńśliwie du dom prziwioz, chocioż musioł poł miasta przejechać. Jest prowda, że takigo ruchu wtedy niy było ani takich łokrongłych skrziżowań. Milicjant w drogowce był yno jedyn – Jasiu, kery znoł dobrze tego formona i jego konia z tom „lordozom”. Woloł łon swojom emkom gonić piratow drogowych na wuefemkach i eshaelkach.Doczkali my sie inkszych czasow. Dzisioj już mało z kim idzie o koniach pogodać, ale o autokach to małe bajtle w szkołce już wszystko wiedzom. Chocioż w naszym mieście jest tako dzielnica Stodoły, nad samom Rudom, kaj konie sie majom bardzo dobrze i coroz wiyncyj młodych ludzi mo chyńć na nich rajtować.UTOPEK
Komentarze