40 straszek 2
40 straszek 2


Som tyż tacy, co nikaj sie z chałupy niy ruszajom, a czasym im nikerzi zowiszczom. Czamu spytocie, bo majom fajniste zegrody, kaj wszystko rośnie i styknie yno rynkom siongnyć, żeby se pomaszkecić. Na grzondce świyże radiski, młodo marchewka i groszek zielony, nic yno używać tych letnich dobroci. Leży se taki w hamaku powieszonym w ciyniu miyndzy dwoma stromami i pluje do gory pestkami z cześni abo objodo sie pozimkami. W kiblu z zimnom wodom nogi se moczy, a ptoszki naokoło śpiywajom. Ja...! – kożdy kij mo dwa końce. Coż, te ptoszki niy zawsze człowiekowi życie umilajom swojim świyrgolyniym. Teraz wom powiym, jako łostuda majom z ptokami ci, co majom ta swoja zegroda, na keryj prawie teraz cześnie som zdrzałe. Przileci na taki strom pora setek szpokow i fajrant, za chwila ni ma co obiyrać, yno pestki sie sujom na ziymia z wiyrchu. Niy pomoże klaskanie, wrzeszczynie i inksze cyrkusowanie, szpoki swoje wiedzom i już.Jo mom tako sama utropa z tymi cześniami i chocioż fest przaja ptokom, to szpokow już mom dość. Kożdy rok coś nowego wynochwiom i na wiela sie to niy godzi. Roz mi ktoś doradziył, żeby kadłubek powiesić na tyj cześni, bo bez mała te szpoki, co tam zamiyszkajom, niy dopuszczom inkszych na tyn strom. Ja, to jest prowda, ale yno do czasu, zanim niy odchowiom swoje młode, a w tym czasie prawie cześnie som jeszcze zielone. Jak som zdrzałe, to moje szpoki już wyfurgły i piyrsze sie do cześni zaprawiajom. Latoś to samo, ale przipomniało mi sie, że idzie straszka zrobić i na stromie go postawić, toż zaroz do roboty. Straszka żech zrobiył szkaradnego (widać na zdjynciu), ale to yno mie sie tak zdało. Szpoki yno jedyn dziyń krajzowały nad nim i żodyn sie niy opowożył siednyć na cześni. Na drugi dziyń zaś cołko chormijo na dolnich astach siodała, a na trzeci już siodały straszkowi na łepie, nawet ściepły mu wstyrczony na nia stary hut po ujcu. Teraz zaś wynochwiył żech nowość, powiesiył żech straszkowi na roztopyrczonych rynkach stare płytki CD, kere sie zwyrtajom na ciynkich sznorkach i blyndujom naokoło.Już trzeci dziyń to działo i ani jedyn szpok niy siod na cześnia, ale niy wiym, czy sie jaki modrzejszy niy znojdzie, co sie zno na technice, bo najgorzij, jak jedyn spróbuje, to za nim zaroz cołki stado siednie.UTOPEK

Komentarze

Dodaj komentarz