Stare Juchy
Stare Juchy


Piyrszy roz, po tym niyplanowym postoju za Czynstochowom, stanyli my kajś w Rawie Mazowieckij, bo trza było dzieciom dać zjeść i samym trocha dychnyć. Ugodali my tyż trasa, żeby minyć Warszawa bokiym, bo ni ma sie tam po co ciś, żeby za dużo niy tracić na czasie. Nojbardzij chalatoł Hajnel, bo przeca Ziga mioł telewizor we swojij syrynce, a tu trza mecze oglondać z Orłami Górskigo, kerym tak fajnie szło.Doś niyskoro po połedniu udało nom sie dojechać szczyńśliwie do Starych Juchow i zaroz żech ich zakludziył na pole namiotowe nad samym jeziorym. Niy trza było wtedy płacić, jak to kaj indzij było, i zaroz my sie chytali stawianio naszych namiotow. Obrali my se tako mało polanka miyndzy sosnami, na gorce. Krom obozu harcerskigo, kery stoł jaki sto metrow od nos, niy było wiyncyj żodnego w tym lasku. Podobało sie wszystkim, nawet szwigrze od Bronka, kero wzion ze sobom, żeby sie jego bajtlami opiekowała. Niych tyż se baba użyje, padoł nom po cichu Bronek, bo jeszcze nigdy na wywczasach niy była. Wiela my tam niy wydziwiali, bo tyż po postawiyniu tych celtow, naplompaniu madracow i wyciongnyciu wszystkich klamorow, jak butle z gazym, garce itp., sami byli my wyplompani. Baby naszykowały wieczerzo i poszli my spać. Dzieciom tyż trza było woda zagrzoć do termoforow, bo jakoś zimne było wtedy te lato.Rano obudziło nas głośne trombiyni „la puka racza…! La puka racza…!!!”. Wszyjscy zaroz wyparzili z namiotow, bo wiedzieli my, kery se taki moderny sygnał w swojij syrynce założył. Uciechy było co niymiara. Piyrszy sie wkuloł Ziga swojom 104-kom, a za nim żołto hajnelowo 105-ka. Gerda zaroz wyparziła z auta z jeji ulubionym sowietskoje szampanskoje w rynce, kery i Hajnel wyrwoł, odpolił go z hukiym i zaroz rozlywoł do szklonek. Przeca taki coś trzeba było uczcić, auto sami naprawiyli w stodole, chocioż w TOS-ie zapłacili za wał ze zabudowaniym i jeszcze halba musieli dać na lepszo. Bez spanio cołko noc jechali, ale jednak pokozali, że syrynka niy na darmo nazywali krolowo polskich szos.Cdn. UTOPEK

Komentarze

Dodaj komentarz