Junost
Junost


Był to ruski telewizor Junost i szło go podłonczyć kablym do auta, bo normalnego sztromu my tam ni mieli. Z dwie godziny trwało, zanim Ziga znojd tyn kabel do akmulatora, bo som go przeca pakowoł i wraziył do pokrowca do kupy z pontonym. Na koniec sie okozało, że jego baba Gerda prziwionzała nim w namiocie wiyszak na swój nowy klajd, coby sie niy pogniot.Potym to już szło roz-dwa i ekran sie w koncu oświyciył. Hajnelowi zaroz sie humor poprawiył, ale niy na długo, bo okozało sie, że ni ma polskigo programu, yno same miganie i rusko godka. O kurde! – padoł, chyba bydymy yno bez radio słuchać transmisje, a jo sie tak radowoł. Ziga krynciył i cykoł wszystkimi wichajstrami przi tym telewizorze, a Hajnel regulowoł drotami z tyj teleskopowyj antyny. Lotali z tym telewizorym naokoło zigowyj syrynki, a w końcu wyciongli tyn akmulator i po cołkim polu namiotowym mogli potym lotać. Bronek nosił akmulator, Ziga telewizor, a Hajnel trzimoł te wszystki kable w rynkach, coby sie Ziga bez nie niy przewrociył. W jednym miejscu kole najgrubszyj sosny udało sie chycić głos po polsku, ale yno wtedy, jak Hajnel stoł ze zadku telewizora i trzimoł w jednyj rynce jedyn teleskop z antyny, a drugom za klamka żołtyj syrynki od drugigo Hajnela. Jo sie w końcu wmiyszoł i godom, żeby my mieli tako normalno antyna i z dziesiyńć metrow kabla, tobych sie wypion na ta sosna i kto wiy, może by szło i obroz dostać. Hajnel zaroz mi przichwolił i już wszystko ciepnył w kont. Roz-dwa z Bronkiym siedli do skody i pojechali do Ełku po jako antyna dipolowo i kabel, ani niy czekali na wspolno kawa, bo to była sobota i boli sie, że im sklepy zawrzom.Niy trwało wiyncyj jak z połtora godziny i byli nazod. Hajnelowi sie pysk śmioł jak szczyrkowka, a Bronek już wyciongoł ta zocno antyna ze zadnigo zica. Niy zapomnieli nawet wtyczki antynowyj kupić. Niy pomogło nic, yno musioł żech wylyźć na ta najwiynkszo sosna i na spuszczonyj sznorze wciongnył żech ta aluminiowo antyna na wiyrch. Telewizor my postawili na masce zigusiowyj syrynki i niy trwało długo, jak chyciyli my piyrszy polski program. Co to było uciechy. Nareszcie mogli my tyn najważniejszy mecz widzieć, jak Lato w drugij połowie strzelił Brazylijczykom gola. Ino niy mog żech się nadziwić, skond sie łoroz przi nos tela kibicow nazbiyrało na tym polu namiotowym.Cdn.UTOPEK

Komentarze

Dodaj komentarz