Kuba
Kuba


Stanik yno na mie wejrzoł i godo:– Wiysz, co to za gizd śniego, co łon już popochoł? Łon tak yno niywinnie wyglondo, ale swoji mo za uszami. Niywiela brakowało, a zjod by mi mojigo malucha.Stanik widzi, że sie tymu śmieja z niydowierzaniym, toż zaczon kludzić dalij godka o tym piyknym piesku:– Roz przijechoł żech z roboty, a było to na jesiyn, toż wypiył żech kawa i padom se trza trocha te liście z tych stromow pozagrabować, co śleciały. Grabiył żech tak pora godzin i nie wachował żech tego Kuby, kajś tam lotoł. Jak żech już skończył, to padom se trza zajechać maluchym na tanksztela, bo mom mało bynziny, a jutro wczas rano musza kajś jechać, to niy byda sie już marasiył z tym. Oblyk żech sie, wzion kasa i ida do auta. Otwiyrom dżwiyrze i... o mało szłag mie niy trefiył. W środku wyglondało jak po wybuchu bomby atomowyj. W piyrszym momyncie niy wiedziół żech, co to je. Piyrzi czy co? A to szwam z zicow z malucha. Kuba zostoł zawarty w maluchu i wyżywoł sie pora godzin na tapicerce. Zeżar dwa zice przedni, zic zadni z oparciym, tapicerka z obu dżwiyrzi, kerownica, z kerej zostało yno metalowe kołko, bez szwamu. W dżwiyrzach uszczelka tyż była zeżarto. Yno jak tyn gizd wyloz z tego malucha? Tak chyba szarpoł te dżwiyrze, aże sie otworziły i uciyk.Jo tak oprził sie o te auto i myśloł, śmioć sie czy płakać. Na koniec trzasnył żech tymi dżwiyrzami, że o mało niy wyleciały z zawiasow i poszoł żech do baru na piwo. Mioł żech już dość całego jeżdżynio. Dobrze, że tyn Kuba nie prziszoł mi wtedy pod rynka. Na drugi dziyń rano pojechoł żech do Niewiadomia na szrot szukać nowej tapicerki do malucha. W tyn sposób, dziynki Kubowi, dorobiył żech sie nowych zicow i kerownice w maluchu.Jednego mie to nauczyło, od tego czasu dycko sprawdzom, czy kaj ze zadku, za zicym, nie siedzi Kuba w aucie. A jak żech se kupiył inne auto, to tak żech go wyszkolił, że na dwa metry niy podchodzi do dżwiyrzi z tego auta.Kosztuje mie tyn Kuba tela zdrowio, że to sie w głowie niy mieści, nigdy nie wiym, co on jeszcze wymyśli, no ale przeca to niy ma wina psa, yno tego, jak go gospodorz wychowie.UTOPEK

Komentarze

Dodaj komentarz