Zdarziło sie roz, że tyn biydny jechoł do czornego lasa po drzewo i ujrzoł, jak w nojwiykszyj gynstwinie wyłażom z takij dziury zbóje. Skrył sie za stromym i rachowoł, wiela ich wylezie. Dwanościoro ich narachowoł i jak tyn ostatni wyloz, to obrociył sie ku tyj dziurze i padoł: „Zawrzijcie sie dźwiyrze!”.Jak zbóje odeszli daleko, wyloz szewiec ze swojij kryjowki, podeszoł ku dziurze i padoł: „Otworzcie sie dźwiyrze!”. Dziura sie otwarła i wloz do nij i ujrzoł mocka izbow. W jednyj śnich było pełno złota i strzybła, jak to ujrzoł, to mu dech chyciyło i w łepie mu zaszumiało. Spamiyntoł sie jednak gibko, naladowoł pełne kapsy, wyloz i na jego komanda dźwiyrze sie zawarły. Jak mu brakło, to zaś szoł do tego gynstego lasa, uwachowoł zbójow i nabroł juzaś pełne kapsy złota i mog dobrze żyć. Babie kupiył nowe klajdy i strzewiki, dzieci chodziły najedzone i piyknie obleczone.Starszymu bratu zaroz to podpadło i chcioł sie go wypytać, czymu teraz jest bogaty. Niy mog sie jednak niczego dowiedzieć, toż go naproł i tyn mu wtedy wszystko wygodoł. Poszli łoba do tego gynstego lasa. Jak zbóje wyłaziyli, to szewiec ich rachowoł, potym wlyźli i nabrali se dużo. Kupiec był jednak chytry i szoł som bez młodszego brata, ale niy rachowoł zbójow, a jedyn tam łostoł i wachowoł.Chyciył kupca, jak tyn ladowoł złoto do miecha i jak prziszli ci drudzy zbóje, to go zabili. Jak niy wrociył du dom, to jego baba prziszła do szewca i prosiyła go, coby szoł po niego. Na drugi dziyń szewiec wzion miech i poszoł do gynstego lasa ku dziurze. Rachowoł zaś zbójow, kerzi wyłaziyli z dziury i jak wszyjscy poszli, to dopiyro łon wloz. Uwidzioł swojigo brata zabitego, leżoł na miechu ze złotym. Wzion go do miecha i zanios du dom.Jak rabczyki ujrzeli, że trupa ktoś wynios, poszli do miasteczka i w szynku sie wypytowali, co tu nowego słychać. Szynkiyrz im padoł, że kupca zabili, a ci od słowa do słowa dowiedzieli sie, kaj łon miyszkoł. Poszli tam i pytali sie wdowy, kto tego zabitego kupca znojd w lesie i du dom przinios. Baba wszystko im pedziała i zbóje poszli pod chałupa od szewca. Tyn jednak, jak ich uwidzioł przez łokiynko, padoł babie, żeby ich zabowiała, a som wyskoczył łoknym ze zadku chałupy do zegrody i polecioł gibko na policyjo.Pochytali wtedy wszystkich zbójow i zawarli w hareszcie, zaś tego herszta, kery był najszkaradniejszy ze wszystkich, łosondziyli i potym powiesili na wielkim stromie, kery rosnył na prociw szynku, na rybnickim rynku.UTOPEK
Komentarze