40 sprzedowaczka 1
40 sprzedowaczka 1


Lańcuch żech namazoł łolejym, piła podłonczył do sztromu i dalij do roboty. Ja piernika...! Lańcuch brusi po pniu choby po zielezie i żodne treciny sie niy sujom jak dycko. Trocha sie yno lańcuch w pniu schowoł, zaczło sie kurzić i woniało choby z wyndzelnika od Dudka. Staro wylazła z chałupy i sie pyto: – Po co tyn gril rozpolosz, czy żeś kogo obsztelowoł już do połednia?Musioł żech skończyć te łechtanie płonki, bo nawet kokot z kurami nerwowo zaglondali na moji wyczyny. Trza nabrusić lańcuch – godom se som do siebie i biera sie za rozbiyranie piły. Zapnył żech lańcuch do szraubsztoka i szukom takij rond fajle, kero żech kiedyś na torgu od Rusow kupiył. Zaś sie nerwuja, bo tyn nimiecki dochtor Alzhajmer mi jom kajś schowoł i niy poradza jom znojść. Szkoda czasu na szukanie, siodom do auta i jada do Rybnika kupić nowo fajla.Właża do jednego sklepu, kaj widać w szaufynstrze rostomajnte werkcojgi do bajstlowanio. Młodo frelka sie pyto, co se życza, toż godom: – Potrzebuja tako rond fajla do bruszynio piły lańcuchowyj. Dziołcha patrzy na mie z otwartom gymbom, jak woł na malowane wrota, to jo zaś tako fajla, co mo kole piynć milimetrow durchmeser. Ta zaglondo na mie i za chwila woło na zaplecze do drugij, trocha starszyj sprzedowaczki: – Pan chce jakąś rondo-fajke... Dopiyro jak żech padoł, że chca pilnik okrongły, okozało sie, że ni ma. Tak mie to rozbawiyło i myśla se – pójda do inkszych takich sklepow i przi okazji sie dowiym, czy to rychtyk jest tak źle z tom naszom godkom w Rybniku. Wloz żech do drugigo sklepu z takimi klamorami i tam to samo godom: „Paniczko, mocie fajle okrongłe do bruszynio lańcucha, do piły?”. Paniczka sie podziwała i prawi: – Powiedz to pan po naszemu. A jo do nij: – Przeca godom po naszymu, ale ona z uśmiychym: – No tak, ale ja nie jestem stąd. Teraz żech sie kapnył i godom: – Aha, z „Bożych stron” pani jest, toż chca pilnik taki okrongły, żeby piłę naostrzyć. To ona zaś grzecznie z uśmiychym: – Mamy tylko do paznokci te „fajle” i oba sie przi tym śmiejymy.Dopiyro w piontym sklepie, powiym yno, że sie do niego po schodkach ślazuje, na moji pytanie usłyszoł żech od młodyj i szykownyj paniczki: – Niy, ni momy żodnych fajli, bydzie musioł panoczek do Obi skoczyć, tam na pewno bydom mieli rond fajle...Zaroz mi sie weselij zrobiyło, jak żech usłyszoł odpowiydź rychtyk po naszymu i myśla, że ni ma tak źle z tom naszom godkom w Rybniku.UTOPEK

Komentarze

Dodaj komentarz