Zaczło sie od gupij rondfajle do bruszynio kety w pile, o keryj żech łostatni roz pisoł. Niy dostoł żech jom kupić w małych ajzyngeszeftach, to zajechoł żech do nowo otwartego w naszym mieście supermarketu, jak mi doradziyła jedna sprzedowaczka.Fajny i wielki sklep, a towaru na fachach, że aż głowa boli. A pamiyntom niy tak downe przeca czasy, że trza było halba postawić, żeby dostać dwa miechy cymyntu abo pora metrow tandetnych kachelkow na łaziynka. Chodza miyndzy tymi wszystkimi fachami i szukom małyj rondfajle. Dobrze, że wszystko popisane, kaj co idzie kupić, toż znojd żech nareszcie tyn sztand, kaj pisało pilniki. Co z tego, jak pojedynczyj rondfajle, kero szło kiedyś na torgu kupić za 2 zł u Rusow, niy dostaniesz. Trza kupić zaroz cołki zatz za przeszło 40 zł. Doł żech se pokoj z fajlami i chodza se dalij łoglondać bele co, przeca za łoglondani niy trza płacić.Wloz żech do działu ogrodniczego i dech mi chyciyło. Przedy mnom cołko łonka rostolicznych orchidei, a jedna piykniejszo od drugij. Żołte, różowe, fiołkowe, czorne jakiś z żółtym rantym, żagate, kropkowate, no cuda, taki żech ani na obrozkach niy widzioł. Kupiył bych jedna babie, ale kero? Ta, co by sie mie podobała, może i sie niy podobać? Przeca mom aparat w kapsie, zrobia fotki wszystkim po koleji, pokoża babie na komputerze, a potym śniom przijada kupić i fertik! Pocykoł żech pora fotek, tak bez blitz-lampy, coby kogoś niy szterować, wraziył żech aparat do kapsy i dalij chodza po tym supermarkecie. Trefiył żech szkolno koleżanka i godka, jak tam u ciebie itd., a tu wroz przichodzi jakoś babka poobwiyszano jakimiś kablami, plaketkami i słuchawkami i prosi mie na bok.– To pan robił zdjęcia przy kwiatkach?– No zrobiył żech pora, żeby żonie pokozać, bo może se keryś wybiere i przijada po niego. Niy pomogło żodne tłumaczynie, musioł żech przi nij wszystki fotki skasować, a trza pedzieć, że sie zno na aparatach cyfrowych, bo niy poradziył żech jom ocyganić, sama mi godała, kaj przicisnyć i wszystkie fotki storczykow żech pozbył.Toż teraz ni moga sie fotkom ani z Wami podzielić, ale namalowoł żech nasz ślonski storczyk „kukawka”, kery za bajtla żech oglondoł na hanysowyj łonce i dobrze go pamiyntom. A do tego sklepu to już chyba niy wleza w życiu, choby tam sprzedowali rondfajle po złotku.UTOPEK
Komentarze