Dobrze, że człowiek dożył takich czasow, bo starzik Francik cołki czas godoł, że kiedyś tu u nos tyż bydzie tak jak na zachodzie, yno łon już tego borok niy dożył. Jakby tak teraz stanył, toby zaroz godoł: – Widziołeś synek! Przeca teraz już tu mocie zachod, yno kowboji na rynku jeszcze ni ma, ale jak som banki, to i łoni sie znojdom.Ida dalij, patrza na tyn wielki bank nimiecki i rozważuja, co by jeszcze starzik Francik pedzioł, jakby tyn napis ujrzoł na dachu. Kole Rospynka zaś widza droga rozkopano i jakiś ruły, szlauchy i kable leżom, a ludzie to przeskakujom, to jo tyż przeskoczył i cisna tom głownom drogom ku bazylice. Uszoł żech konsek i czuja, że keryś za mnom blisko depce, toż ściskom pod parzom bardzij ta moja taszka z papiorami, bo mi jedna baba pedziała, że jakiś młodziok porwoł i taszka zniynacka i nim zdonżyła coś zrobić, już sie straciył w nojbliższym ajnfarcie i fertik. O te pora groszy i niy było szkoda, ale miała tam swoja dyskietka z kasy chorych i nowo wyrobiony dowod. Musiała iść gibko na policyjo to zgłosić, bo przeca w bankach keryś umi na nia jako pożyczka wziońć, kiej gibko dowajom.Z takimi myślami kontym oka spoglondom do zadku, kery mi tu po piyntach depce. Jeronie…! Ażech podskoczył, co tak żech sie wylynkoł. Ujrzoł żech jakiś hełmisko z rogami na głowie, a za pasym topor jakiś złoty, że nic yno rombać. Przeca to jakiś Wiking, ale co łon tu robi w Rybniku? No ja, Wikingi to som zbóje, kerzi łupili wszystkich, to możno, jak sie dowiedzieli, że tu momy tela bankow, przijechali zbadać, czy sie opłaci. Okozało sie jednak, że tyn Wiking ni ma wcale taki groźny i nawet szło śnim po naszymu pogodać. Padoł mi, że tu rychtyk przijechoł obejrzeć, czy tu tako biyda momy, bo nasi młodzi ludzie wyjyżdżajom do założonego przez nich Dublina, żeby tam coś przirobić.Ja starziku, tyś mioł rychtyk recht, „Ameryka na kołkach” tu momy pomału, ale żeś sie pomylił, bo zamiast kowbojow, pryndzyj przijechali Wikingi, bo przeca łoni, tak jak my, tyż miyszkajom w Europie.UTOPEK
Komentarze