Po naszymu
Po naszymu


Tak blank ajnfach to jednak niy wyglondo, bo zanim przidzie do tyj gonitwy, to nojprzod jadom paradnie jedyn kole drugigo. Trza pedzieć, że to jest wielki świynto dlo tych fesztrow i myśliwcow. Muszom być na ta sposobność odpowiednio łobleczyni. Czerwony frak, biołe pompki, czorne boty wysokie z bronotnymi manketami i glazyjki irchowe. Na głowie musi być toczek. Może tyż być taki jeździec łobleczony choby na zawody jeździecki, ale dycko musi wyglondać szarmant i elegancko.Jest to bardzij na pokaz wszystko i musi być wszystko na ostatni knefel pozapinane. Konie tyż muszom być wyglancowane i prziozdobione świycidełkami, warkoczykami i szlajfkami kolorowymi. Majom tyż swojigo majstra te zawodniki i muszom go słuchać. Kożdy musi jechać na przidzielonym miejscu i ni może drugimu zajechać drogi, a już najgorzij, jakby kery przedjechoł tego majstra przed tom końcowom pogoniom za lisym. Na tyj wytyczonyj trasie majom tyż rostoliczne przeszkody, jakiś przikopki, przewrocone stromy i żerdzie, przez kere trza przeskoczyć.Hubertus to jest tako wspolno zabawa i widowisko dlo widzow, kerzi czynsto stojom na cołkij oznaczonyj trasie przejazdu, ale najwiyncyj przi takich przeszkodach, kaj sie zdarzo, że taki piyknie łobleczony panoczek londuje w przikopie z wodom, śmiychu wtedy przi tym co niymiara.Był żech kiedyś na takim Hubertusie na ziymi lubuskij i chocioż to już kupa lot minyło, pamiyntom wszystko dokładnie i dycko o tym czasie mi sie o tym przipomino. Skończyło sie to przi wspolnyj fojerze z pieczyniym wusztlikow i popijaniym dobrego piwka. Dzieci zaś miały wielko uciecha pojeździć na koniu w siodle, kerego trzimoł na długim powrozie som majster tyj hubertusowyj gonitwy.UTOPEK

Komentarze

Dodaj komentarz