Prawie tak miyszo starzik w tym garcu, jak ktoś zaklupoł do dźwiyrzy, był to jego bracik Johanek, kery prziwioz pożyczono od niego maszynka do kronżanio kapusty. Jak poczuł świyżo woń młodego wina, zaroz sie ośmioł i godo:– Jo mom nos, pra Francik? Dycko trefia, jak ty wino przelywosz!Starzik Francik już nic niy godoł, yno zaś wstyrczył szlauch do korbflasze i spuściył zaroz dwa litry tego kalnego wina do zbonka, bo wiedzioł, że na jednyj glasce Johanek niy popuści.Zanim starka Maryjka wrociyła z kościoła, to już oba bracio mieli chyba po litrze w lajbie, a wesoło było w kuchni jak w odpustowyj szisbudzie. Zaczli śpiywać o braciach sokołach i jeszcze tam jakiś ułańskie o Maryśce, co im wina broniła.Starka już na dworze słyszała, co jest lołs, toż zaroz wparziła do kuchnie z larmym:– Zaś miłe braciszki sie trefiyły przi korbflaszy! Zaroz mi jom Francik zawiyrej, bo wezna tłuczek i rozwala ci ta bania na wiyszce. Już żeście zapomnieli, coście popochali łoński rok? Za co sie teraz weźniecie?Ja, popochali łoński rok fest i tyż łoba przi probowaniu wina. Yno że łoński rok starzik Francik robiył te wino poł na poł ze żytym. Winogronow było yno trocha, bo niy bardzo był rok pasowny, jak godoł starzik, i wsuł do tyj korbflasze reż napynczniało i zagerowano przed tym w garcu.Toż tym razym przelywka starzik już rano robiył, bo dycko go bracik naszoł, jak po połedniu sie chyciył wina, ale i tak Johanek przijechoł jak na ujma. Zgerowano reż starzik wysuł na gnojok i zaczli kosztować we dwojka wino, bo starki tyż w doma niy było, pojechała do swojij siostry Any. Jak już śpiywali, to wloz do izby ujec Zefek i godo:– Tatulku, czamu te kury na gnojoku leżom do gory szłapami?Starzik Francik i jego brat Johanek podziwali sie na niego, bo myśleli, że ich za błozna robi, wyleźli i widzom, że yno kokot jeszcze chodzi, ale belonce nim na wszystki strony.– To jest jakoś zaraza! – padoł Johanek – bo u somsiada tydziyń tymu to samo było. Starzik zaroz wzion siykyra i wszystkie kury zabiył, bo po co sie majom mynczyć – padoł. Jak starka przijechała du dom, to yno rynce załomała, jak ujrzała kupa kur kole gnojoka, yno kokot obstoł, bo mu sie udało przez płot do somsiada przefurgnyć.UTOPEK
Komentarze