Wodny diobol 2
Wodny diobol 2


Przeca to istny dioboł wodny – pomyśloł Hanys – bo przeca z utopkiym mom do czyniynio.Toć sie przeca niy pomylił, bo to był utopek, kery sie w jego stawach zagnioździył, wielce sie roztopyrczo i rzondzić by se chcioł, choby to łon był gospodorzym.Niy czekoł tyż Hanys na nic, yno łaps go pod pijok i chcioł tego utopka do gory dźwignyć, ale tu sie chachnył. Chocioż dwa razy myjnszy był od niego utopek, tak ani by był do ziymie przirosnyty, ruszyć go z miejsca niy szło. Wywinył tyż zaroz Hanysowi w pysk, że zaroz mu gwiozdki w oczach się zaświyciyły. Hanys tyż niy był jakimś chyrlokiym, yno chopym, co mo siła i knif do bitki, toż zaroz mu fronknył dwa szlagi wiyncyj. Oszydziył sie Hanys z tym biciym, bo niy wiedzioł, że chocioż utopki som taki małe, to siły majom piekelne, bo tyż z piekła pochodzom.Co roz utopkowi chlasnył w pysk, to tyn sie yno ośmioł i wrociył mu zaroz. Myśloł Hanys, że utopek mo jaki młotek w swojij pazurze. Po jednym takim mocniejszym szlagu sie przewrociył i kto wiy, jak by sie to skończyło, kiejby niy namacoł na ziymi orczyka, kerym tyż zaroz wzion utopka w obyrtaka. Wspomniało mu sie tyż, że starzik mu kiejsik godoł, że utopka trza majdykom walić. Gibko tyn orczyk przełożył do lewajtki i zdzielił w palica utopka, że tyn yno jynknył, ale zaroz sie z placu straciył. Jeszcze yno ziymia parowała w tym miejscu, kaj stoł przed chwilkom tyn wodny dioboł.Hanys na drugi dziyń stanyć z łożka niy poradziył, co był tak obtrzaskany przez tego gizdawego utopka.Od tego czasu sie skończyły te komedyje i utopek już niy robiył nic na złość Hanysowi.UTOPEK

Komentarze

Dodaj komentarz