Pamiyntom, jak mój kamrat Ziguś dostoł na urodziny taki blaszany szif
do nakryncanio na fedra. Był przi nim taki mały kluczyk, kerym sie jom nakryncało, a potym puszczało sie tyn szif do wanny z wodom. Co to było uciechy, jak my go we dwojka puszczali, a łon szpluchtoł na nos wodom ze szruby, kero sie ze zadku krynciła. Gibko sie jednak Zigusiowi zmierzło puszczanie w małyj waniynce takigo wielkigo szifa, toż jedyn piykny dziyń wyrwali my sie po kryjomu na gliniok przi cegelni, kaj było dużo wody.Jak my yno z tym szifym na droga wyleźli, zaroz sie przi nas znojdła kupa dziecek i pora starszych od nos synkow. Z cołkom chormijom poszli my na gliniok puszczać tyn pomalowany modrom farbom blaszany szif
. Mioł łon tyż dwa kuminy na wiyrchu i pomalowane łokiynka z boku, zaś ta szruba była na czerwono pomalowano. Ziga nakrynciył ta fedra do samego końca i pomału posadziył szif na woda, tak żeby przejechoł tako mało zatoczka w tym glinioku. Wszyjscy my zaś zaglondali z ciekawościom, czy aby dopłynie na drugi brzyg. Szif jednak nic se z tego niy robiył i za jednym nakryncyniym przewalił te trzi metry jak raketa.Starsze synki zaczli wtedy podpuszczać Zigusia, że taki szif to przeca poradzi cołki tyn gliniok pokonać w migu, bo co to tam jest te gupi dwadzieścia metrow dlo niego. Ziguś podbudowany takimi słowami wyciongnył szif i z wyplyźnionym jynzykiym zaczon nakryncać do oporu fedra. Nasztelowoł kieronek na pojstrzodek i puściył ta „luxtorpeda” na woda. Zrazu szif sztartnył z kopyta, ale czym bliżyj był pojstrzodka, tym pomalij mu ta droga ubywała, aże w końcu stanył na środku glinioka i dalij ani rusz. Wyrczoł jeszcze doś chwila i było widać, że coś go trzimie, ale w końcu ustoł i yno trocha sie kolyboł na boki. Starsze synki uznały, że jakoś trowa mu sie zamatlała do szruby i trza kamiyniami pociepać kole niego, to go fala ku brzegu zarzynie. Tak potym zaczli bombardować wszyjscy tymi kamiyniami, że biydny szif dostoł roz voltrefer i poszoł na dno przi akompaniamyncie rozbeczanego Zigusia. Niy wiym, czy dostoł wtedy szmary od fatra, ale długi czas sie na dwor niy pokazowoł.UTOPEK
Komentarze