Nojprzod tym, co miyszkajom w blokach i inkszych familokach, co by somsiady niy larmowały po nocach, niy podlywali im kwiotkow na balkonie z wiyrchnigo sztoku i niy ciepali sztomli pod dźwiyrze.
Wszystkim, co jeżdżom autym, co by niy trefiyli na drodze takigo, kery im cołki czas na łogonie siedzi, abo takigo, kery yno wachuje na okazjo, żeby go kacnyć, zaroz sie wryć przed maska i ostro hamować.
Tym, kerzi kupujom w tych wielkich sklepach, co by im te wozki jechały w ta strona, kaj człowiek chce. Żeby sie im udało otworzić plastikowy bojtlik bez śliniynio palcow i dmuchanio, no i żeby ni mieli pecha wciepnyć do wozka takigo towaru, kery na kasie niy blinko i co by kasjerka niy musiała co chwilka dzwonić abo lotać sie dowiadować, co wiela kosztuje.
Wszystkim telewidzom, żeby w nojbardzij ciekawym momyncie programu telemarkeciorze niy kozali im kupować lykow przeciw sztresom abo maści na himoridy.
Tym wszystkim, kerzi majom radzi porzondek, żeby sie niy nerwowali, jak ktoś wyciepnie papiorek z bombona na chodnik. Żeby żodyn grafficiorz niy napisoł Wom na świyżo pomalowanyj chałupie czy na płocie, że kibicuje za Odrom. Żeby sie żodyn niy wciskoł przed Wami do kolejki z tłumaczyniym, że łon tu stoł przed Wami. Żebyście w miyjscach publicznych niy musieli słuchać głośnyj godki komorkowcow, kerzi sie chwolom, jak spyndzili noc, kaj i z kim, kogo poznali i z jakom osobistościom se za jedno teraz godajom. Żebyście nigdy niy wdepli na psio „mina” przi szpacyrze po parku czy na chodniku.
Trza tu jeszcze wymiynić taki rzeczy, co fest szterujom, jak te automatyczne cyntrale telefoniczne, kere Wom kożom prziciskać wszystki knefliki, zanim sie kajś czegoś dowiycie. Wyskakujonce reklamy w internecie abo ta niychciano poczta elektroniczno, kero Wom wasze skrzinki zacisko. Niygrzeczni urzyndnicy w nikerych urzyndach, co sie jeszcze czujom tak jak za komuny i niy znajom słow proszę i dziękuję. Objazdy i sztyjc rozkopane drogi i chodniki, kere co dopiyro nowe położyli.
Wiym, że do tego wszystkigo, co nos szterowało łoński rok, kożdy mo coś do dołożynio, ale jo chcioł bych Wom yno życzyć, żeby na bezrok żodyn niy umioł wymiynić ani jednyj takij rzeczy, kero by go droźniyła.
Komentarze