Jak to wczoraj było? Zaroz sie dowiycie:
– Witej Stanik! Downo my sie niy widzieli i o mały figel bych cie ani niy poznoł.
– Ja, bo mie widzisz normalnego jak nigdy, pra? Obejrzij, rynka mi sie zrosła, pysk mi sie wygoił i musza ci pedzieć, że już niy trefisz Stanika poodziyranego.
– Coż tak? Przestało ci już piwko smakować abo ci staro pedziała, że cie odyńdzie?
– Ale chopie! Co to godosz, mie by miało piwo przestać smakować? A staro tyż jest rada, że mie mo. Kaj by znojdła drugigo takigo Stanika z takom pynzyjom?
– No ja, to mosz recht, ale godej dali, bo umiyrom z ciekawości, co ci sie tak odmiyniło?
– Teraz jak mie Krzysiu ze szynku kludzi, to ni ma mowy, żebych kaj wpod utopkowi do rzyki. Pryndzyj żech to mioł wiedzieć, że idzie se takigo „anioła stróża” fondnyć. Powiym ci, że nigdy bych o tym niy wiedzioł, keby do mie kuzyn z Zobrza niy przijechoł.
– To tyn kuzyn sie Krzysiu nazywo? I powiydz, że sie zgodził z baru cie kożdy dziyń kludzić dudom?
– A kto ci to padoł, że mie łon kludzi? Podziwej sie na tego mojigo wachtyrza. I tu wyciongnył spod kabota jakiś mały laptopek i mi pod nos ciśnie. Wiysz chocioż, co to jest GPS?
– No wiym, ale przeca ty auta ni mosz. To na coś to kupiył?
– Podź konsek symnom, to ci pokoża, a ty mie Krzysiu kludź do mamulki – poszkroboł po ekraniku jakimś sztyfcikym. Idymy tak konsek z rynku na Raciborsko i za jako chwila słysza głos od Hołowczyca: „Na najbliższym skrzyżowaniu w prawo…”.
– Podziwej się, co tyż to za piykne urzondzyni – godom – ale tego bych ani po cichu niy pomyśloł, że tyn rajdowiec, kery taki jest ciynty na łożyrokow, teraz kludzi ich przez satelita ze szynku dudom. Co za czasy, koniec świata! „Proszę zwolnić, jesteś na ulicy Dworek i możesz sobie uszkodzić zawieszenie…!” – odezwoł sie stanikow GPS.
Komentarze